Durante un entrevista Parlamentario di Partido MEP, sr. Guillfred Besaril, a sigui elabora riba un tema cu a bin ta hala basta atencion e ultimo siman, esta edad di Pensioen General na Aruba. Parlamentario Besaril a declara lo siguiente.
“Dos siman pasa mi a anuncia cu una bes den Gobierno, Partido MEP lo baha e edad di Pensioen na 62 aña! Un mensahe cu a hala hopi atencion den e comunidad laboral y cu tabata punto di enfoke politico durante e dianan cu a sigui despues di e anuncio aki.
Den un analisis cu ayudo di profesionalnan den e ramo di recurso humano, nos Partido a tuma nota cu e aumento di edad di pensioen na 65 aña tin entre otro como consecuencia:
1. Poco mobilidad riba e mercado laboral,
2. Desempleo grandi (specialmente bou nos hobenan) y
3. Disminucion di productividad den cierto sector bou di esnan cu pasa e edad di 60 aña.
Den grupo menciona den punto tres mi a referi especialmente na esnan cu ta labora den por ehempel e sector di housekeeping, stewarding, construccion y trabounan di warda den cual e factor “salud” ta asina critico, cu e ta hasta un crimen pa exigi di nan pa sigui labora te na 65 aña. Ta p’esey baha e edad na 62 aña no ta simplemente un promesa di campaña, sino un compromiso di Partido MEP cu e clase trahado!
Una bez cu mi a anuncia cu MEP lo baha e edad di Pensioen na 62 aña, mi a wordo literalmente bombardea pa un grupo den nos comunidad cu a aplaudi e iniciativa di nos Partido, pero cu a lansa di biaha e pregunta: “Y anos awo? Ki dia?” Ta trata aki di e grupo grandi di pensionado riba nos Isla.
For di nan mi a compronde cu nan ta haya cobransa bastante halto di belasting na momento di tin pensioen di biehes combina cu nan pensioen di trabou.
Pa no Papia mes den caso di tin otro entrada adicional ya cu e pensioen no ta alcansa ni pa nan sobrevivi!
Nos partido tin e ley di iniciativa cla traha. Mane cu MEP drenta gobernacion e ley lo elimina e belasting riba e pensioen di biehes p’asina evita cu e pensionadonan haya cobransanan halto den caso di tin entrada adicional. Nos partido tin como punto di partida cu nos grandinan a traha duro y a paga suficiente belasting caba.
Ami kier pa nos grandinan – cu a traha y/of a sacrifica asina tanto na pone Aruba unda cu e ta awe como Pais – gosa di nan senectud sin preocupacionnan inecesario. Por ultimo nos lider, sra. Evelyn Wever-Croes, a yega di elabora den pasado riba e tema di formulario di Inkomstenbelasting y nos grandinan. Sra. Wever-Croes a duna e opinion di Partido MEP cu tur pensionado cu tin solamente pensioen di biehes mester haya un dispensacion na yena e formulario di inkomstenbelasting, ya cu e ta crea solamente mas molester y preocupacion pa nos grandinan. Igual cu den e caso di e clase trahado y edad di pensioen, e no ta djis un promesa sino un compromiso di Partido MEP na alivia e peso financiero y e situacion di belasting di nos grandinan”. Parlamentario Besaril a termina.