Parlamentario Evelyn Wever-Croes a entrega un carta na e gobierno nobo, buscando aclaracion riba cua minister ta encarga cu cua departamento. E pregunta aki ta basa riba e hecho cu ultimamente por a nota cu tin varios minister ta haciendo trabounan di otro, y cu entre nan no ta existi un confiansa.
Parlamentario Wever-Croes a expresa cu pa Parlamento por haci su trabou di controla Gobierno debidamente, ta hopi importante pa nan sa cua minister ta encarga cu cua cartera. Na e momento aki esaki no ta mucho cla mirando cu por ehempel e Minister di Labor ta Wendrick Cecilia pero ta Minister Arthur Dowers ta tumando decisionnan, e Minister di Relacion di Reino ta Gerlien Croes pero esunnan cu ta papia ta Prome Minister Mike Eman y Minister Geoffrey Wever. Tambe den e caso di e Minister di Economia cu ta Geoffrey Wever, awor Prome Minister Mike Eman ta invita señor Miguel Mansur pa yud’e riba e tema di economia. Pues ta importante pa Parlamento haya un bista cla di e Gobierno aki cua minister ta encarga cu kico.
Tambe por a nota cu e gobierno ta firmando hopi cos, sin cambia e ley pa duna esakinan base legal. Mas importante, a pesar cu ley ta stipula cu mester tin un minister di integridad, no tin niun minister actualmente encarga cu integridad. Pa e motibo aki nos a manda un carta pa gobierno cu varios pregunta, den espera di un contesta pronto pa asina elimina tur confusion cu tin den comunidad y den Parlamento.
