Dia 3 di april 2025, Presidente Mericano Donald Trump a anuncia un aumento substancial den tarifanan di importacion, cu ta afecta mas di 180 pais y region rond di mundo. Despues di e anuncio un lista a wordo publica, den cual Aruba tambe ta wordo menciona como un di e paisnan cu por wordo afecta. E medida aki a causa preocupacion mundial pa motibo di un posibel recesion economico y represaya di otro paisnan. Como representante di pueblo, nos tin e obligacion di pidi claridad na e ministernan concerni relaciona cu un desaroyo cu por tin consecuencia grandi pa nos pais.
Pa es motibo, Lider di Fraccion di MEP, sra. mr. Evelyn Wever-Croes, a entrega un serie di pregunta na Minister-President sr. mr. Mike Eman y Minister di Finansa y Economia sr. mr. Geoffrey Wever. E preguntanan aki tin como meta pa haya claridad kico e impacto real por ta riba nos economia, mirando cu Aruba ta hopi dependiente di importacion, y con Gobierno ta plania pa proteha e cartera di nos ciudadano.
Nos no por kita afo cu nos ta enfrenta cu un situacion cu por tin consecuencia grandi pa nos comunidad. Pesey ta bon pa sa si Gobierno tin un plan di accion pa mitiga e efectonan negativo, specialmente den sector comercial y turistico, y pa proteha esnan mas vulnerabel den nos comunidad.
Na banda di esaki, lider di Fraccion ta pidi claridad tambe si gobierno di Aruba ya tin contacto diplomatico cu e gobierno Mericano pa busca un excepcion riba e tarifanan, si ta tin cooperacion regional cu otro paisnan y si gobierno tin plan concreto pa diversifica e economia, pa haci Aruba menos dependiente di importacion door di stimula produccion local.
Lider di Fraccion ta urgi Gobierno pa sali cu informacion claro y concreto. Silencio den un momento asina crucial no ta un opcion. Tur ciudadano merece di sa kico ta e realidad actual y kico gobierno ta haci pa defende e interes di nos hendenan.
Lider di Fraccion, sra. Evelyn Wever-Croes ta keda en espera di un contestacion pronto y transparente di parti di ambos minister. Manera cu ricibi e contestacion lo comparti esaki cu comunidad.
