Parlamentario Evelyn Wever-Croes a elabora riba e preocupacionnan cu CAFT tin pa loke ta trata e parti financiero di Pais Aruba. Den fin di siman cu a pasa, Parlamentarionan a reuni cu CAFT.
Manera nos sa CAFT ta e instituto cu ta haci e supervision financiero pa Pais Aruba. Riba 27 di Augustus aña pasa Gobierno di AVP a pidi pa pone Parlamento bou di curatela financiero.
“Y for di e dia ey nos tin e instituto aki manera un rosea cayente den nek di e Gobierno aki pa pone su finansas na ordo”, sra Wever-Croes ta bisa.
Pa e motibo aki, e delegacion di CAFT ta bin Aruba algun biaha pa aña y semper ta haci un bishita na Parlamento. E reunionnan aki ta di indole confidencial pa cual motibo no por duna informacionnan completo riba e discucion y conclucionnan cu a tuma lugar.
“Mi no por bay duna informacion cu mi ta haya durante e reunionnan cu CAFT. Mi lo limita mi mes pa duna solamente informacionnan cu a sali publica den e consehonan di CAFT den e ultimo relatonan di prensa cu nan mes a duna”.
Sra Wever-Croes ta bisa cu CAFT ta preocupa pasobra e Gobierno aki no ta haciendo suficiente pa pone su finansas na ordo.
CAFT ta preocupa cu e cuenta anual 2015:
E cuenta anual 2015 (jaarrekening) no a yega Parlamento na ora. AVP ta broma masha cu e presupuesto a yega na ora sinembargo e presupuesto 2017 cu a wordo entrega mester a bin hunto cu e cuenta anual di 2015. Y esaki no a pasa.
CAFT ta preocupa pa e presupuesto 2016:
CAFT a indica cu e manera cu cos ta mustrando na e momentonan aki, no ta sigur cu Gobierno lo alcansa su metanan pa 2016.
CAFT ta hopi preocupa cu Banco Central a downgrade e crecemento economico.
Gobierno a tene cuenta cu crecemento economico di un tiki mas di 3% pero Banco Central a caba di downgrade esaki te na 0.4% di crecemento e aña aki. Esaki ta un downgrade hopi considerabel y segun CAFT esaki consecuentemente tin su influencia negativo den e presupuesto di e aña aki.
Kico ta e pasonan cu Gobierno lo tuma den e caso aki? Den mas di un ocasion Gobierno a laga sa cu ta pa e motibo aki mes a bin cu e deal di CITGO. Y cu den e aña aki caba, CITGO lo bay trece placa den caha di Gobierno. Lo bay trece algun miyonnan for di huurmento di terenonan. Cu esaki Gobierno ta pensa di bay tapa e buraco financiero cu a wordo crea.
Sinembargo CAFT, mescos cu nos tambe a cuestiona Gobierno den e reunion tocante CITGO siman pasa, kier sa kico e risiconan ta. Y ta puntra tambe si tin un risico analyse. Esaki ainda Gobierno no a entrega.
CAFT ta preocupa tambe cu presupuesto 2017.
Segun ley di CAFT, LAFT, Gobierno mester tin un deficit di 0.5%. Den e documento cu Minister di Finansa, sr Bermudez a entrega dia prome di September, e ta bisa cu e la logra esaki. Sinembargo Banco Central a ahusta e crecemento economico considerablemente p‘e aña aki caba cu tin su efectonan economico otro aña. Segun calculacionnan entre Raad van Advies y CAFT lo no bay yega na e deficit di 0.5% sino mas bien rond di 2%.
Den e publicacionnan di CAFT ta nota cu nan a pone un tipo di ultimatum riba Gobierno. Gobierno mester pura y manda e cuenta anual di 2015. Mester bin un cambio den presupuesto 2016. Y tambe pa presupuesto 2017 mester bin un nota di cambio riba loke cu a wordo entrega pasobra esaki no tabata realistico y lo no bay logra e meta.
“Partido MEP a laga e topico di finansas un banda pasobra nos a pensa cu Gobierno a siña su les. Nos a pensa cu e Gobierno aki cu a pidi pa e mes wordo poni bou di curatela financiero lo a sa di atende cu e tema financiero y duna un miho maneho.
Lamentablemente, despues di a reuni cu CAFT y despues di a studia tur e documentonan di CAFT, e conclusion ta cu tin hopi mas motibonan di ta preocupa cu tin pa ta trankil riba e situacion financiero di nos Pais”, sra Wever-Croes ta conclui bisando.