Parlamentario Endy Croes ta sumamante orguyoso di Gabinete Wever Croes cu un logro asina grandi den temponan hopi dificil unda a logra reduci e prijs di coriente cu 10% entrante 1 di januari 2020.
A converti promesa den hecho
Diahuebs den oranan di atardi rond di 3’or Gobierno a yama un conferencia di prensa extraordinario na unda a haci e anuncio oficial. Cu e anuncio aki Gobierno ta cumpli cu entre otro un promesa di MEP ancra den Programa di accion di partido MEP 2017-2021 bou di e titulo “Nos compromiso pa un maneho di energia sostenibel”, esta lo sondea e mihor forma di energia cu tin mester cual lo conduci na reduci prijs di coriente pa pueblo. Gabinete Wever Croes a logra converti su promesa den hecho. Desde januari 2020 por ehempel un famia cu ta paga averahe 250 florin pa luna na coriente lo keda cu 300 florin extra pa aña den su cartera. Promer Minister Evelyn Wever Croes – basa riba promesa di campaña y insistencia di di su Fraccion – for di ‘day one’ a pone man na obra y a duna instruccion na Utilities pa sondea tur manera pa por cumpli cu e deseo di Gobierno pa cu pueblo.
Bagamunderianan cu placa di pueblo
Mesora a kibra contractonan abusivo cu a wordo hereda, entre otro cu Horizon Consultancy di Richard Arends di AVP kende a bay cu mas di 500 mil florin di Utilities, companianan di Patrick Paskel y Speed manera Thera Group y Paparazi kendenan a strica casi 7 miyon di gobierno y mas di 600 mil di Utilities, contracto manera di abogado Sjiem Fat kende tambe a cobra rond di 5.3 miyon di gobierno y masha hopi placa di Utilities. Tambe a pone un “STOP” na e bagamunderianan di sponsorship di miyones na proyectonan Green Aruba, “Europe Meets the Americas” (adhunto un muestra di mas di 100 cu tin). A stop contracto miyonario cu Richard Branson. A bin cu un maneho “drechi” riba hedging y nunca pero nunca mas lo usa e sistema di “boef” di Mike de Meza y AVP unda WEB a perde 230 MIYON florin cu e hedging di AVP cual a desemboca den un aumento di tarifa di 15% dia 1 di october 2014. Prohibi pa lubida con pueblo a wordo bati malamente!
Ta duna pueblo bek locual e merece
Aunke den un tempo hopi dificil pero cumpliendo cu un vision y un maneho coherente, cabando cu abuso y hortamento “fini” den Utilities y WEB a logra asina reduci e prijs di coriente cu 10% cuminsando dia 1 di januari 2020. Coalision a hereda un gobierno na werki dia 17 di november 2017 pero a percura pa “stop the bleeding” y traha pa pueblo. No a mishi cu e prijs cual tabata 0.3681 cent /kwh (bron WEB) y awe ta logra reduci esaki. AVP si a aumenta e prijs di coriente cu 35.7% den 8 aña y awe nos a inicia e caminda pa duna pueblo bek locual e merece. Pabien Aruba y danki na Gabinete Wever Croes cu e gran logro aki. Nos a priminti y nos a cumpli!