Parlamentario Endy Croes ta amplia riba deporte unda e ta compara loke cu Ramon Lee a logra como minister di MEP compara cu e desaster di AVP.
Yegada di COVID-19 dia 13 di mart, 2020, a causa cu deporte en general a wordo afecta enormemente. No obstante esaki Minister di Deporte Dangui Oduber tabata tinie hopi dificil desde november 2017 cu a tuma e cartera di deporte over. Pa cuminsa si compara e periodo di MEP 2001-2009 y AVP 2010-2017 por tuma nota cu tras di un vision y un maneho agresivo di Ramon Lee di ex minister di deporte 2001-2009 ora a inverti masha hopi na infrastructura y inversionnan cuantioso den e atleta directo. A logra construi cu placa di Lotto Stadion Frans Figaroa, Stadion Nadi Croes & Crismo Angela, converti Parke Jaburibari di un dump ( cu AVP a laga atras na 2001) pa un Parke multi funcional, a traha dos centro deportivo na Jara y Simeon Antonio, a traha dos parke di baseball na Pos Chiquito, a renoba y drecha iluminacion na 15 cancha rond Aruba y banda di esaki a inverti 20 miyon den Federacionnan pa cu e Atletanan y Seleccionnan directamente.
AVP sinembargo den periodo (2010-2017) no a construi ni un solo facilidad, no a mantene e facilidadnan cu MEP a construi pero a opta pa malgasta 10 miyon florin di deporte solamente na investigacion, abogado, companianan di investigacion. Mas tristo ta cu a perde tur caso den beroep y cassatie. Deporte por a uza e placa aki na otro forma. NO a mantene e stadionnan unda awe futbol por ehempel mester hunga weganan internacional den exterior, no a traha ningun facilidad y Lotto ta draai den problema cu mesun directiva cu Mike De Meza y Mike Eman a instala desde e tempo aya.
Gobierno actual no tin grip riba Lotto:
Den historia tin graba cu desde 1982 a logra habri Lotto pa Deporte. Tras di vision di Betico Croes, Remy Zandaam y Roy van Putten e tempo aya a bin cu Lotto pa Deporte pa deporte por haya su luga den comunidad unda placa di Loteria ta bay pa deporte y asina haci deporte menos dependiente di gobierno. “Lamentablemente AVP a kibra esaki y a uza miyones pero miyones di Lotto na abogado, companianan di amigo y a kibra totalmente e esencia di Lotto. Na 2018 Dangui Oduber a bay corte cu Directiva di Lotto y a perde den corte. Pues Hues a considera cu e mesun personanan cu ya a sinta 8 aña por continua. Net prome gobierno a cambia AVP a laga cambia Statutonan di Lotto unda e mesun miembronan di directiva te cu awe ta “gelijm” riba e stoel ey pa mas di 10 aña cu ta contra tur regla di “good governance”. Pa e rason aki Minister di Deporte no a ricibi durante ultimo 4 aña ningun cooperacion di Lotto y mester tabata hopi creativo di otro forma pa logra brinda asistencia y ayudo na diferente organisacionnan deportivo.”
Ley di Gaming Board:
Na Parlamento tin awo un ley cu a yega esta e ley di Gaming Board cu durante aña 2021 lo wordo trata. En todo caso muy pronto y prome cu september e mester ta cla. E ley aki lo trece oportunidad pa por bin cu un di dos loteria. Esaki lo crea competencia sano. Gobierno aki hamas lo firma locual AVP a firma na 2011 den desesperacion unda nan a traspasa tur e poder y placa pa CBN Canada. Aruba awe ta na rudia y deporte sufriendo. Cu un Lotto nobo Aruba lo conoce competencia husto y unda tin competencia semper e pueblo ta sali beneficia y den e caso aki deporte lo sali beneficia. Lo percura den e proximo gobernacion banda di bin cu un di dos loteria pa re-negocia e contracto cu CBN Canada pa un contracto fair y husto. Asina pueblo por mira y sinti bek unda su placa ta bay. Por cumpra Lotto bek cu amor pasobra si bo perde mes bo ta mira unda bom placa ta bay entre otro na facilidadnan y e atleta. E sentido aki ya no ta biba mas actualmente den pueblo. Lo traha duro pa re-establece e confiansa den e pueblo cumprado y e contacto y efecto directo cu esaki tin cu e deportista.