Enseñansa ta un punto hopi importante pa partido MEP y e futuro Coalicion. E solucion pa tur e problemanan di nos pais ta enseñansa. Pasobra sin Enseñansa nos no tin nada. Lamentablemente enseñansa a wordo neglisha hopi den ultimo añanan. No tabata tin mucho innovacion den enseñansa. Falta material y falta maestro, y e opcionnan di studio ta limita. Esaki ta loke cu Parlamentario di MEP Endy Croes ta bisa den su declaracion.
Admiti e realidad y brinda Bo aporte lo contribui:
“Banda cu nos ta ta confrontando retonan grandi mei mei den un Pandemia nos lo percura pa duna enseñansa e atencion cu e merece. Coalicion nobo definitivamente lo tin enseñansa na pecho. Nos ta den un tempo dificil pero tampoco tin e luho pa ta debatiendo cu otro na un forma creando distancia en bes di solucion. Nos ta den un tempo cu mester di union unda nos tur mester di otro y pues “union” lo bira e compas y guia pa e veld di enseñansa. Ban traha pa e bienestar general di Aruba y brinda nos muchanan e oportunidad cu nan merece. Ta ideal pa trece tur esnan den e field hunto kendenan tin e amor na pecho pa hiba enseñansa na un otro nivel. PEN 2030 (Plan Educacion Nacional) ta ehempel di un bon punto di salida cual ta refleha trabou y participacion di hopi stakeholders den ekipo.”
Mehora calidad y nivel di enseñansa:
Lo percura pa actualisa e maneho di idioma y curriculum, pa asina nos eleva e calidad di enseñansa. Lo trece innovacion y digitalisacion den enseñansa y miho material di enseñansa.
Un otro punto importante ta cu nos mester haci enseñansa accesibel pa tur hende, pa evita cu ora mayornan no por sigui paga scol of buki pa nan yiunan, e yiunan stop di bay scol.
Lo percura pa introduci ambachts school pa prepara studiantenan di nivel LBO mesora pa Mercado laboral. Tambe lo percura pa e estudionan di MBO, HBO y WO, ta sincronisa cu e necesidad riba nos mercado laboral, ya tanto EPI, IPA y Universidad ta deliver studiantenan cu por haya trabou mesora na Aruba mes. Lo inverti den enseñansa pa adulto. Lo sigui e procesonan prescribi den Landspakket dunando semper nos propio contribucion pa e miho resultado saliendo di punto di bista di PEN 2030.
Pa stimula nos hobennan sigui estudionan den exterior, lo introduci e posibilidad di fiansa di estudio sin interes pa nos hobennan cu bay studia den exterior, por bolbe Aruba bek. Alaves lo enfoca pa por logra mas graduado y menos drop outs.
Docentenan:
Docentenan mester haya mas sosten den forma di klasse assistenten y trahador social pa asina e problemanan social di nos muchanan wordo atendi pa profesionalnan y asina e docentenan dedica y enfoka nan mes na duna les.
Lo percura tambe pa duna mas participacion na docentenan den decisionnan importante di enseñansa. Nos ta consciente cu ta nos docentenan tin e bista directo den e field y sa kiko ta come y bebe den enseñansa, y pesey mester duna nos docentenan mas participacion. Parlamentario Endy Croes a termina deseando tur studiantenan hopi exito y maestronan pasenshi y inteligencia pa cu e aña escolar nobo cu a caba di inicia.