Parlamentario Endy Croes: E “BOM” AZV lo explota den nos cara

Parlamentario Endy Croes na diferente ocasion durante aña 2019 a haci remarkenan fuerte alrespecto gastonan di operacion di AZV. Den luna di mei como 6 Parlamentario di Fraccion di MEP a haci un bishita oficial na Staff di AZV pa por a scucha tambe di nan banda di e situacion.

Tin indicacion cu tin hopi filternan den AZV cu mester wordo corigi pero banda di esaki nos mester pensa tambe pa cambia e Ley di AZV cual mester conduci cu AZV por bira sostenibel den futuro. Tur esaki mester tuma lugar sin afecta e calidad di cuido.

Gastonan mas grandi di AZV ta por ehempel gastonan di Hospital cual ta core entre 180 pa 200 miyon florin pa aña. Buitenlandszorg cual a piek den 2016 un total di 62 miyon florin. IMSAN un otro 30 miyon anual. Boticanan un total di 52 miyon pa aña. Un total di 44 Huisartsen 24.5 miyon pa aña. Specialistanan ta costa AZV un otro 22 miyon pa aña unda specialistanan cu un contracto promer cu 2012 ta cobra un maximo di Afl. 900.000 pa aña mientras esnan cu un contracto despues di 2012 ta cobra Afl.650.000 pa aña. Laboratorio ta alrededor di 24 miyon pa aña y hulpmiddelen un otro 14 miyon pa aña. Personal di AZV ta consisti di alrededor 84 empleado cu un costo di 19 miyon anual na salario.

Por tuma nota cu desde 2010 gastonan operacional di AZV tabata rond 349 miyon florin y esaki a alcansa 427 miyon florin na 2017 cual ta refleha un crecemento di 22%. AZV tin riba 110 mil cliente di cual 17000 ta clientenan cu un of otro permiso entre otro sea permiso di trabou of verbijfsvergunning. Parlamentario Endy Croes ta ilustra su preocupacion inmenso den caso di AZV.

Banda di tur otro problemanan financiero cu Aruba ta pasando aden door di un maneho desastroso di Mike Eman y AVP, ta tempo awor pa hunto nos pone atencion na AZV. Den 2020 mester pone esaki como prioridad y sinta cu tur stakeholders pa hunto nos sali cu e mihor decisionnan posibel pa corigi esaki y por sigui carga un seguro sostenibel pa futuro. Si esaki mester bin cu cambionan grandi interno y di maneho asi sera pero no por sigui carga awa hiba lama, Parlamentario Croes ta termina bisando. Den 2020 ta toca turno na AZV!

Comments

comments