Parlamentario Endy Croes: “Durante reunion di IPKO a contesta preguntanan di Hulandesnan alrespecto e desaster real di Mike Eman y AVP”

Parlamentario Endy Croes a refuta cu recientemente tabatin un reunion di IPKO (Interparlementair Koninkrijks Overleg) cual a tuma lugar di 6 pa 10 di januari na nos hermana isla Corsou. Delegacionnan cu Parlamentarionan di Aruba, Corsou y Hulanda tabata presente mientras cu Sint Maarten no por a participa debi na eleccion cual a tuma lugar dia 9 di januari na Sint Maarten. Riba agenda tabatin entre otro puntonan manera Situacion na Venezuela, Verkiezingswaarneming, Milieu, Energie y Klimaat. Tambe a dedica na SDG’s People y Planet and Prosperity. Otro punto tabata Integriteit van Bestuur. Pues un agenda toch basta pisa cu reunionnan henter dia.

Preguntanan riba finansa di Aruba
Durante reunion di IPKO Parlamentarionan ta haya oportunidad den cada break, lunch of dinner pa sinta na mesa cu diferente Parlamentario Hulandes unda hopi pregunta ta wordo haci di ambos banda. Locual a hala hopi atencion ta preguntanan riba e parti financiero di pais Aruba. No obstante cu Parlamentarionan Hulandes ta mustra hopi satisfecho cu e maneho financiero actual di pais Aruba unda den 2 aña a logra baha e deficit di Mike Eman cu tabata 444 miyon pa apenas 4 miyon den 2019. Den aña 2020 tur cos ta mustra cu lo logra 25 miyon di surplus di acuerdo cu e normanan financiero.

Bagamunderianan financiero di Mike Eman
Pregunta cardinal cu a keda bin dilanti con ta posibel cu Mike Eman por a presta 2200 miyon florin esta 2.2 Biyon den apenas 8 aña sin cu ningun instancia, sindicato, comercio por a para esaki. Cada rato nan tabata puntra si ta berdad cu Aruba a paga 232 miyon florin den 2019 na interes. Pues nos a tuma nota cu miembronan di Tweede Kamer y Eerste Kamer ta na altura di e desaster financiero cu Mike Eman y AVP a ocasiona pero como cu esaki ta asina espantoso nan kier manera reconfirma e cifranan monstruoso aki.

Asina mester a splica nan con Mike Eman no solamente a hinca Aruba den un posicion debil y fragil cual lo dura 20 aña pa nos logra baha e debe nacional bek na 50%, pero Mike Eman a abusa di placa di pueblo na un manera sin igual usando prensa comprometi pa logra su obhetivo.

Asina Patrick Paskel cu Speed a strica casi 7 miyon, abogado Sjiemfat amigo di Mike a ricibi compensacion di 5.3 miyon di placa di pueblo, Coordinadornan hunto cu esnan cu a traha den Cocolishi a cobra 142 miyon di pueblo den 8 aña. Mike Eman a haci su birthday party dia 1 di september 2017 den porta di eleccion riba Brug y paga esaki cu placa di pueblo, un total di 142 mil florin.

Nos a splica nan con Mike Eman a pasa un Ministerraadsbesluit pagando na 4 ocasion pa Robert Candelaria bin Aruba cu tur cos paga pa negocia su posicion riba lista y finalmente Mike Eman a paga pa su casa y henter famia bin Aruba cu contract y trabou cu salario lucrativo. Tambe a duna nan informacion mas concreto di e proyectonan PPP unda desde 2019 ta pagando 80.9 miyon pa 20 ãña largo.

Mas bagamunderia di Mike Eman
E Hulandesnan a keda masha babuca cu e desaster financiero y e Mega Debe cu Mike Eman y AVP a construi. Como cu nan preguntanan tabata hopi dirigi riba finansa y integridad y tambe a puntra si Mike Eman por a faborece su famia. Mesora nos mester a conta nan di e auto di Drag Race di ruman homber di Mike Eman kende a ricibi 1.6 Miyon di entre otro ATA pa 1 solo auto di careda.

Tambe mester a splica nan na placa chikito con Mike de Meza a nombra mama di esun casa cu su yiu den un posicion pa logra nan meta, esta strica 1.6 miyon florin. Asina nan a bin riba mesa topiconan manera Carvajal, Kiko Gomez, Roberto Rincon. Tur ta friendsnan di Mike Eman y AVP y tur ta cera awe. Nan a puntra masha hopi riba e caso di Paul Croes y Benny Sevinger y si por ta trata di un of otro persecucion.

Riba esaki tambe a duna informacion cu website y documentonan concreto pa nan por update nan mes. Na final nan a keda contento alabes hopi decepciona di Mike Eman y AVP. Por a nota nan actitud cu AVP a cambia hopi durante reunion. Poco poco mas nan mes puntra mas nan lo haya sa e berdad y realisa cu AVP ta e partido cu a desgracia pais Aruba di tal forma cu lo dura hopi aña pa saca Aruba for di e abismo cu AVP y Mike a hinca Aruba aden.

Comments

comments