Parlamentario Endy Croes: Bloke AVP-MAS- Accion 21 a vota contra pa bestel bulletproofvest pa Polis

Parlamentario Endy Croes a atende su prome reunion di Comision Central di Parlamento # 11  den sala di Parlamento di Aruba  dialuna mainta 12 di Juli.  Presidente di Parlamento Sr Edgard Vrolijk a yama un reunion di Comision Central pa trata “gevoelens” di Parlamento riba  algun punto di agenda al respecto peticion di Minister di Husticia Sr Andin Bikker. Aunke no por bay ful den detayes di contenido di e reunion di Comision Central mester desaproba e manera “fofo” con e Bloke AVP-MAS- Accion 21 a rechasa e ayudo pa polis.

Minister kier adelanta pa order bulletproof vests pa Polis:

Como cu no tin un presupuesto aproba ainda pa cu aña 2021 Minister a scoge pa bin Parlamento pa pidi “gevoelens” di Staten pa asina por adelanta un posibel order di 550 bulletproof vest pa agentenan policial en bista e situacion cu ta reinando actualmente na Aruba.

No solamente ta deber di cualkier gobierno pa percura pa siguridad di su pais pero ta deber pa tuma decisionnan pa protege esnan cu ta proteha pueblo. Mas aun cu Aruba ta biba di turismo y no por laga e situacion actual cu ta reinando bay for di man cu tur e consecuencianan cu e por tin pa henter pais Aruba. Ni cuanto Minister saliente a splica Parlamento di e urgencia y importancia cu esaki tin,  toch finalmente fraccionnan den Bloke di AVP- MAS y Accion 21 a vota CONTRA pa aloca fondo pa bestel 550 bulletproofvest y pues contra e siguridad di Cuerpo Policial.

No obstante esaki MEP y RAIZ a tuma un posicion na fabor di e Polisnan y a vota VOOR. Cu 11 voto na fabor y 10 contra e gevoelens di Staten ta aproba pa e Minister por dal bay order e bulletproofvestnan pa Polisnan anticipando e tratamento di begroting y a condiciona esaki cu e lo keda dentro di e begroting di Husticia entrega na Parlamento pa cu aña 2021.

Parlamentario Endy Croes ta termina bisando cu ora ta trata di bida di hende y den e caso aki proteccion pa esnan cu ta proteha nos “bo mester por para den bo sapato y tuma decision na fabor di pueblo y den e caso aki na fabor di KPA. No ta ora pa sali hunga politica barata. Ta lamenta masha hopi e actitud  den e prome salida di partidonan den oposicion sin argumento y sin  base a ilustra hopi cla kico por spera di nan den e proximo 4 añanan.”

 

Comments

comments