Parlamentario Endy Croes Aruba recuperando di e catastrofe di Mike Eman

Parlamentario Endy Croes ta felicita Gobierno pero specialmente minister Xiomara Ruiz
Maduro y Minister Presidente Evelyn Wever Croes hunto cu nan conseheronan kendenan a
percura pa un logro importante. Manera ta conoci Mike Eman y AVP a laga atras un desaster
financiero nunca bisto y un Aruba na rand di bancarota y casi ingobernabel. Un Mega Debe
unda e aña aki por ehempel pueblo mester paga 232 miyon florin solamente na interes riba
placa cu Mike Eman y AVP a presta. Banda di esaki mester paga 80.9 miyon florin e aña aki
y pa e proximo 20 añanan na proyectonan PPP cu AVP a firma sin cu tabata tin presupuesto y sin sa di unda mester saca placa pa paga esakinan. E gobierno nobo aki ta sinta cu e batata
awor y mester ta creativo pa cumpli cu obligacion di e mal maneho di Mike Eman y AVP.
Responsabilidad y culpabilidad Esaki ta un parti chikito di e desaster pero gobierno a sinta november 2017, a lora manga di camisa y a cuminsa traha. Banda di tur esaki nos ta cu un Hulanda hincha tur na spina y kier mira e gobierno aki corta su pueblo te den ader pa drecha e desaster di Mike Eman den solamente 2 aña. Un desaster di cual Hulanda ta co-culpabel pasobra ta bou nanishi di CAFT y Staatssecretaris e bagamunderianan financiero a tuma lugar. Den e lama bruto aki y den un situacion cu condicionnan sumamente delicado a logra traha un plan financiero pa asina Aruba por wordo poni bek riba “rails” pasobra Mike Eman, AVP y e toezicht di Hulanda a “ontspoor” Aruba totalmente. Momento cu CAFT a drenta Aruba na 2015 bou di AVP e debe nacional tabata core den 75% y momento gobierno nobo a wordo forma y drenta den funcion 17 november 2017 a hereda un debe nacional di 93% di GDP. Esaki ta muestra cu CAFT tabata complaciente cu Mike Eman y mester carga su responsabilidad y culpabilidad. Recuperacion di credibilidad
Bou di maneho di Mike Eman (AVP) kende ta e autor autentico di e desaster financiero di
mas grandi den historia di pais Aruba, Standing & Poor’s desde juni 2013 caba a
“DOWNGRADE” Aruba pa NEGATIVO, esta BBB-. Mike Eman cu su prensa cumpra
manera entre otro Patrick Paskel y Speed Andrade a sconde esaki. Esaki ta ilustra e rumbo
incorecto cu Aruba tabata bayendo. No obstante tanto cos malo cu Aruba a pasa aden na man di Mike Eman y AVP toch e gobierno nobo a keda pensa positivo. Banda di e plan di rescate pa cu e parti di finansas publico e gobierno nobo a carga fe y speransa cu por maneha e situacion di tal manera cu por logra recupera credibilidad y confiansa bek di e rating agency nan international.
Rating di Negativo pa Stabiel
Recien e vision y maneho aki a duna su fruto den un tempo relativamente cortico. Aruba a
ricibi e bon noticia cu e compania di rating Standing & Poor’s (S&P) a reconoce e cambionan y esfuersonan di Gabinete Wever Croes a y ta haciendo pa recobra credibilidad financiero di pais Aruba. Standing & Poor’s a tuma nota di tur e trabounan duro y compromiso cu e gobierno aki tin pa cu su pais. Despues di haci nan evaluacion profundo Standing & Poor’s a bay over na hisa e rating di Pais Aruba di Negativo (Mike Eman) pa STABIEL (Gabinete Wever Croes). E rating nobo aki ta uno sumamente positivo pa pais Aruba pa cu e mercado internacional. E rating nobo aki ta brinda inversionistanan e confiansa bek pa haci inversionnan na Aruba. Pronto den lunanan nos dilanti nos lo bay nota esaki y poco poco
pero sigur Aruba lo recupera di e catastrofe cu Mike Eman y AVP a causa na e pais aki.
Pabien minister di finansas Xiomara Ruiz Maduro, pabien Minister Presidente Evelyn Wever
Croes, pabien gobierno y pabien Aruba. AVP no mag di bolbe nunca pero nunca mas.

Comments

comments