Parlamentario Endy Croes a elabora riba e ley di LWTF cual a wordo trata y aproba 19 di Augustus ultimo. E landsverordening voorkoming en bestrijding witwassen en terrorismefinanciering AB 2011 no.28 ( LWTF) mas diferente otro ordenanza cu tin un of otro conexion cu e ley aki a wordo ampliamente trata durante un reunion publico unda a trece varios cambio cu Parlamento a aproba.
Un total di 40 recomendacion di FATF
Financiel Action Task Force ( FATF) a duna 40 recomendacion pa asina yuda crea un sistema adecuado treciendo nos leynan mas den liña pa cumpli cu standard y leynan internacional pa combati 3 aspecto particularmente esta labamento di placa, financiamento di terorismo y financiamento di proliferacion . Pues un cantidad di cambio den diferente ley di supervision pa asina logra verscherpt e control.
E cambionan ta enfoca hopi riba compliance alrespecto AMF ( Anti money laudering) y CFT ( Combating Financing of Terrorism). CFATF cual ta Caribbean Financial Action Task Force lo ta na Aruba final di augustus pa un “on site evaluation” pa evalua si Aruba a cumpli cu e recomendacionnan di FATF. Pa e motibo aki tabata importante pa ehecuta varios cambio pa Aruba no cay den default.
Financiele Inlightingen Eenheid su nomber a cambia pa FIU:
Un otro cambio cu a tuma luga ta cu e Financiele Inlightingen Eenheid ( FIE) unda MOT ta resorta a haya un nomber nobo. Esaki a bira FIU Aruba esta Financiel Inteligence Unit Aruba. FIU ta wordo usa den casi tur pais y asina e nomber ta mas aligna den cuadro internacional.
Un mocion pa revisa leynan di Banco Central a wordo aproba:
Durante e reunion publico aki Parlamentario Endy Croes a trece dilanti cu enrealidad nos mester cumpli cu leynan y reglanan internacional. Pero tampoco por ta asina cu como isla chikito nos keda traha leynan cu ta haci cumplimento pa comerciantenan y stakeholdersnan den area financiero dia pa dia mas dificil y costoso. “Nos mester hustamente percura pa crea un redcarpet na Aruba pa nos entrepeneurnan local y inversionistanan internacional na un manera atractivo. Desde habri un cuenta di banco, pasa actonan na notario y sectornan financiero por ehempel mester por duna un servicio mucho mas rapido.” Enconexion cu e pensamento pa agilisa y flexibilisa supervision den cuadro di ley Parlamentarionan Geoffrey Wever di partido Raiz y Endy Croes di MEP a bini cu un mocion durante e reunion publico aki cual mocion a wordo aproba unanimamente. Encorto a urgi gobierno pa forma un comision cu expertonan pa entre otro den 90 dia bini cu un conseho riba e ley di LWTF pa evalua ki tipo di ahustacion ta posibel y ki cambionan ta aceptabel cu obhetivo principal pa Aruba keda cumpli cu rekisitonan internacional pero alabes mehora e posicion di concurencia internacional di Aruba. Tambe pa reduci e peso administrativo y financiero riba e sector financiero.
Finalmente e posibel cambionan aki mester desemboca den stimula economia. Un otro parti den e mocion pa den 90 dia investiga y conseha gobierno si na Aruba mester introduci un sistema unda tareanan di e instancia di Supervision ta wordo separa di tareanan di Banco Central conforme e “Twin Peaks” model manera ta e caso na Hulanda. Ta keda enespera awor pa manera cu gobierno forma haci e follow upsnan necesario pa instala e comision aki pa inicia mesora cu tareanan describi den e mocion.