Parlamentario Edgard Vrolijk (MEP): “Un grupo di amigonan den AVP a enrikece nan mes mientras pueblo ta esun cu ta sali perdi”

Na momento aki pais Aruba ta pasando no aki so, pero internacionalmente hopi berguensa pa motibo di AVP. Un partido politico cu a demostra di ta parce mas un organisacion criminal cu un partido politico. Unda cu a duna muestra con ta percura pa un grupo di amigonan a enrikece nan mes mientras pueblo ta esun cu ta sali perdi. Na final di dia esunnan cu ta pasando berguensa y tambe tin di paga e mega debenan crea ta e ciudadanonan kendenan tin di paga cu orguyo pa motibo di un lider iresponsabel. Tur e casonan di corupcion rond di AVP su ministernan, falsificacion di documentonan, labamento di placa, estafa, mal uso di funcion ta muestra cu Mike Eman lo mester ser considera e lider di e banda aki di AVP, den bista di su funcion como lider di AVP cu ta na altura di tur cos y a permiti esakinan sosode.

Gabinete Mike Eman 1 y 2 y casonan coruptivo

Ex minister Paul Croes tabata e prome caso bao di Gabinete Eman 1 y 2, unda cu e minister aki a ser condena na 4 aña di prison pa entre otro mal uso di su funcion, soborno, labamento di placa. Awo nos ta den bista cu un biaha mas un ex minister di Gabinete Mike Eman 1 y 2 ta den luz negativo cu ta Benny Sevinger cu tambe Ministerio Publico a haci entrada na Aruba den diferente lugar y tambe na Corsou den e caso aki. Un biaha mas un minister ta haci su mes obhetivo di un investigacion penal a base di falsificacion di documento, soborno, labamento di placa y mal uso di su funcion, treciendo cara di pueblo na berguensa un biaha mas.

Mas casonan di ex ministernan

Recientemente pueblo tabata testigo di e mesun modus operandi di mal uso di funcion ora cu  Richard Arends – despues di a pluma nos NV’snan cu su compania Horizon Consultancy – a haya ta bon pa e hunto cu Mike de Meza traha un bon contracto y ningun hende na Aruba tabata sa. Pues no tabatin un solicitud habri pa e puesto di director financiero di RDA. Un contracto lucrativo di 22.375 florin pa luna, mas 3000 florin na januari pa bashi premie y 3000 na november, 1050 florin pa luna na telefoon y costo di representacion, un auto na balor di 80.000 florin, seguro di bida di 750.000 florin pero sigur un clausula di 2.6 miyon si cualkier gobierno termina su contracto di trabao. Ta danki na ciudadano cu tin Aruba na pecho cu esaki a sali na claridad y a forsa Richard Arends tuma su retiro boluntario y cu a scapa pueblo 2.6 miyon florin. Mike de Meza den e caso aki ta coresponsabel y ta e mesun figura aki tambe ta esun cu a autorisa tur biahe di Robert Candelaria pa Aruba y tambe a otorga Candelaria un dushi contracto di casi 8.000 florin pa luna pa bay riba lista di AVP. Tambe a percura pa nombr’e como director di Scheepvaart. Ainda falta mas berguensa den caso di RDA pa sali na cla cu lo pone nos pueblo un biaha mas den luz negativo di corupcion.

AVP nunca mas

Hopi reaccion nos a ricibi di pueblo y cu sigur ta harta di AVP. Den pasaso ya caba e partido AVP tabata hinca den asuntonan di corupcion y den negoshi cu mafiosonan Italiano cu a haci cu pa 15 aña Aruba a paga garantia duna pa construccion di hotelnan (Beta, Ramada y Plantation) pero nunca a traha esakinan y tambe e famoso Racetrack. Y pa no lubida Fondo Desaroyo Nobo San Nicolas. Y awo un biaha mas cu pueblo a duna nan un chens nan a bin mas golos cu nunca pa placa di pueblo. Y p’esey a yega ora cu pueblo manera hopi cu a sostene nan den bon y den malo a bisa: Nunca mas cu AVP!. Y sigur pregunta na abo como hoben bon educa na cas y tambe bon prepara lo sigui sostene corupcion? Abo cu ainda ta riba lista di AVP, bo tambe ta aproba tur e bagamunderianan aki?

 

Comments

comments