Parlamentario Edgard Vrolijk (MEP): Un biaha mas AVP y Benny Sevinger ta pone Aruba su cara na berguensa

Nos por a tuma nota cu un biaha mas Ministerio Publico a sigui cu su investigacion pa locual ta e caso Avestruz, unda c’ un biaha mas a drenta cas di parlamentario Benny Sevinger di AVP, mihor conoci como Benny Kilowatt (pa motiBo di a horta coriente) of Benny e Libertador di Aruba. Ora hopi hende ya a kere cu e caso di malversion di tereno y fraude haci door di ex minister y actual parlamentario di AVP sr Benny Sevinger a bay pa olvido, por a ripara cu esaki ta den su ultimo etapa y unda sigur esaki ta indicacion cu esaki lo bira un caso mas grandi ainda cu di ex Minister di AVP sr Paul Croes.

Parlamento como entidad y pais Aruba nan imagen na berguensa
Locual mas ta preocupa pueblo ta e aspecto di imagen y integridad den Parlamento. Nos tur sa cu Partido AVP no conoce e palabra integridad y nos por a constata esaki caba ora a bay contra e ley di screening di Ministernan. E palabranan cu si partido AVP conoce ta: corupcion y haci fraude. Den e proceso aki di investigacion lamentablemente Aruba su imagen pero tambe e imagen di e entidad Parlamento ta na berquensa pa motibo cu un biaha mas tabatin entradanan hudicial na su mansion.

Benny Sevinger mester retira
Ta na su lugar pa sr Benny Sevinger tuma su retiro for di Parlamento paso e ta pone e entidad su cara na berguensa. Pa su partido e actonan aki ta algo normal paso esey ta ser siña na e scol yama AVP y por confirma esaki paso e ta e unico partido den historia di Aruba cu cada bes tin persecucion di nan ex ministernan pa fraude y corupcion y mal uso di poder y ta ser condena tambe. Si como entidad nos ta enfoca riba e aspecto di integridad mi ta kere ta na su lugar pa tur parlamentario di AVP entrega nan retiro hunto cu Benny Sevinger paso nan ta sigui sostene tur maldad di Benny y di AVP.

Aruba su libertador nobo ta na punto di perde su libertad
Despues cu parlamentario Benny Sevinger a habri aña ta proclama su mes como e libertador nobo di Aruba, awe cu entradanan hudicial na su mansion pueblo ta na borde di perde nan libertador. E libertador nobo aki ta na punto di perde su libertad, pa motibo di a enrikece su mes y a priviligia su amigonan y sponsernan y a sirbi su mes pa permiti fraude y corupcion, unda awe pa motibo di su manera di actua pa beneficia un grupo poderoso di sponsernan, Aruba di 2009 pa 2017 a ser manda practicamente bancarota y unda awe cu Covid ta sinti e efectonan di su mal gobernacion hunto cu e lider di e mafiosonan sr Mike Eman. Mas tristo ta cu hasta ainda despues di a masacra finansas di Aruba, awendia cara di pueblo ta na berguensa un biaha mas danki na AVP y e eleccion aki ta na man di pueblo si ta permiti e grupo di bandido yama AVP bin un biaha mas pa masacra e pais aki y sigui pone Aruba su nomber internacionalmente na berguensa.

 

Comments

comments