Parlamentario Edgard Vrolijk (MEP): Ta urgi mas cu nunca na Minister President pa haci un investigacion rapido riba Serlimar, DIP y DOW

Den cuadro di integridad, transparencia y bon gobernacion ta di vital importancia pa Prome Minister Evelyn Wever- Croes institui un ekipo di experto pa haci investigacionan rapido den Serlimar, DIP y DOW prome cu por sigui dilanti. Sigur awo cu ta di dos director di Serlimar cu ta bay den menos cu 3 aña di gobernacion y ainda mas preocupante ta cu ministernan di mesun partido cu tin e carteranan aki ta acusa otronan di a haci actonan coruptivo den asuntonan di tereno. Te hasta ta acusa un colega minister di a mal usa e ley di destaho publico y tambe di a otorga contractnan cu hendenan spirito. Ta di vital importancia pa nos Prome Minister ta na altura di tur esakinan den cuadro di transparencia y bon gobernacion y sigur den cuadro di integridad. Minister President mester ta na altura kico ta pasando den departamentonan y sigur pa kita e duda cu nos Minister President lo ta tapa cosnan cu a bay robes pa por keda goberna.

Serlimar
Den menos di 3 aña di gobernacion y cu un partner den gobernacion , dos director a bay y tambe dos minister sin cu a trece nada na e solucion di problematica di sushi na Aruba. Locual si nos por a constata ta un atake formal di e ultimo Minister riba su colega anterior di actonan cu por ser categorisa fraudulento, pero sigur cu segun e ex minsiter aki cu a haci e situacion di Serlimar mas vulnerabel. Y sigur pami como parlamentario ta di vital importancia pa sa y pa pueblo sa ta kico a pasa den Serlimar y ta pa es motibo cu e departamento aki mester keda bao di Promer Minister pa investiga y sigur purba ainda pa remedia y salba e compania y trece solucion a corto tempo pa cuminsa atende e problematica di sushi na Aruba porfin.

DIP
Di 2001 pa awo DIP ta simbolo di corupcion. Unda bo bira ta pluma bo ta haya. Di 2009 un ex Minsiter yama broedende kip a ser investiga pa WODC den cuadro di brug di madushi y otrogamento na supuesto sponsersnan di campaña. Di 2009 pa 2017 a conoce un Avestruz, di 2017 pa 2019 un Flamingo y awo un biaha mas di 2020 un broedende kip unda cu un biaha mas tin indicacion di actonan no corecto. Ta na su lugar pa pone ordo y sigur percura pa DIP por conoce un mihor imagen bao di encargo di nos Promer Minsiter cu ta para pa integridad y sigur unda cu su mandato pa depolarisa DIP di politiconan e prome stap a ser tuma.

DOW
Den DOW basa riba acusacion di e ex Minister na su colega di partido, ta haci hopi urgente pa e cartera keda bao di nos Promer Minister pa haci e investigacionan necesario pa por percura tambe pa depolarisa e departamento di politica y percura pa inverti mescos cu mester ser haci na DIP pa un sistema di track unda tur hende por wak unda nan peticion ta.

Como parlamentario mi ta para pa integridad, bon gobernacion y transparencia
Como parlamentario mi ta para pa integridad, bon gobernacion y transparencia. Mi ta den opinion cu esakinan ta di vital importancia pa e departamentonan aki keda bao encargo di Minister President p’asina atende cu nan y sigur haci e investigacionan necesario, pa kita e imagen eroneo cu tin eyfo cu nos Minister President ta tapa casonan di corupcion bao di e gobernacion aki. Ta sumamente importante pa trece trankilidad y sigur confiansa bek den e ciudadano cu a bay perdi, debi na cada bes tin actonan cu no ta cuadra cu ley ta sigui pasa y sigur a bira un circulo vicioso. Ami sigur kier pa kibra e circulo vicioso aki, paso si nos kier percura pa Aruba tin futuro mester ser kibra di una bes por todo!

Comments

comments