Parlamentario Edgard Vrolijk (MEP): “Mester bin un solucion a largo plazo pa e problematica di desperdicio na Aruba”

Recientemente nos por a tuma nota cu habitantenan di Parkietenbos a hiba gobierno corte y esaki a duna gobierno un termino di 3 luna pa por trece un solucion pa e problematica di dump na Parkietenbos y e molester di holor di Sero Thijshi. Y esaki ta na su lugar tambe pasobra pa añanan e habitantenan ta bibando den un situacion indeseabel.

Importancia pa haya contesta riba preguntanan
E situacion di Parkietenbos y e problematica di desperdicio ta algo cu mester yega na un solucion no solamente riba un termino cortico pero esaki mester bira un solucion duradero y sostenibel. Den esaki e rol di Serlimar lo mester ta uno hopi importante. Y den esaki mester percura pa Serlimar ta financieramente stabiel pa por carga cualke proyecto a largo plazo y p’asina trece un solucion pa e problematica di desperdicio na Aruba. Y pa e motibo aki ta hopi importante pa mi por ricibi contesta riba mi preguntanan cu mi a dirigi na Minister pa loke ta e situacion di Serlimar. Alabes mi preocupacion ta e situacion financiero y operacional di Serlimar cu mester bira uno sostenibel.

Solucion pa problematica di sushi
E situacion di e dump di Parkietenbos ta deplorabel y a yega momento pa cera y percura pa sanea esaki pa por brinda tambe e oportunidad na e aerea di naturalesa cu pa añanan a bay perdi rond di e dump. Mester por recupera y crea un zona sano un biaha mas cu awo a bira un zona contamina y unda mangrovenan a bay perdi.
Tin diferente solucion riba mesa, unda pa cera e dump mester bin un sanitary landfill y unda ta separa sushi y deposita na cada lugar corespondiente y mientras ta reduci e sero di Parkietenbos y crea un lugar sano. Pero esaki no ta suficiente pasobra esaki ta un parti di solucion pero mester bin algo mas y mester percura pa conscientisacion unda pueblo mester bira mas consciente riba e uso di desperdicio y lo mester reduci e cantidad di sushi na cas y tambe bay den e pensamento di reusa y recicla. Den otro caso gobierno tabata pensa riba un Incinerator pero sigur e situacion financiero di Serlimar y pais Aruba no ta e mihor debi na debenan extravagante di gobernacion anterior ta haci esaki mas dificil. Bailing tabata un opcion pero actualmente mirando e molester di holor esaki ta haci e opcion aki uno dudoso, Pero tambe tin e posibilidad di exporta esaki pa un periodo di tempo unda cu Aruba y Serlimar ta haya e espacio financiero y tempo pa bin cu un solucion duradero y sostenibel pa e problematica di sushi y medio ambiente den e pais aki.

Ley di Serlimar
Hopi ta critica e ley pero e ley aki lo crea e plataforma financiero pa haci Serlimar sostenibel y alabes lo percura pa Pais Aruba reduci su subsidio y e placa aki por ser inverti den crea un Sanitary Landfill y cera e dump na Parkietenbos definitivamente. Y e mecanismo di control cu nos di parlamento di fraccion di MEP a trece den e ley unda cu cada 6 luna den e proceso pa stabilisa Serlimar financieramente e minister y e director tin di bin duna cuenta na Parlamento. Esaki sigur ta crea e mecanismo di control y lo percura pa haci Serlimar sostenibel financieramente. Tambe lo percura pa esaki por mehora nan operacion y asina impedi cu den un futuro nos desperdicio lo por cay den man di un compania cu lo tin e monopolio y cu e lo stipula tarifa y nos lo experencia locual ta pasando na entre otro nos waf di carga unda cu ki ora cu kier ta lanta e prijsnan di container y ningun hende no por bisa nada.

Comments

comments