Parlamentario drs. Shailiny Tromp-Lee (MEP): Cada caso di abuso ta un caso di mas!

Ta hopi cruel con un hende grandi por abusa di un mucha/hoben inocente. Kita e briyo di su wowo, e sonrisa di su cara, e inocensia di su ser y e alegria den su bida.
Mi ta mama di 3 yiu y mi kier a sigura pueblo en general cu nos Fraccion y Gobierno ta trahando duro ariba abuso di mucha y abuso contra hende muher. Cada caso ta un caso di mas. Mi ta subraya e echo cu mescos cu mi no kier nada malo sosode cu mi yiunan, mi kier haci tur cos den mi poder pa preveni cu cualkier mucha ta keda abusa na cualkier forma.

Mi sa cu e sentimento cu ta reina ta cu e pasonan no ta concretisando liher suficiente. Nos tambe ta sinti igual pero e ta un proceso extenso cu ta tumando lugar. No solamente mester ahusta y amplia e ley pero na mes momento nos kier asegura cu implementacion di e ley lo tin e resultado desea. Pa e ley por tin efecto, e infrastructura y recurso humano necesario mester ta in place.

E problema mas grandi pakico hopi biaha e sentencianan ta resulta hopi abou ta pa motibo di un proceso di investigacion y documentacion deficiente. Esaki pa diferente motibo manera falta di prueba, falta di e personal necesario y cualifica y no papia mes di e falta di material necesario pa documenta y investiga debidamente.

Personalmente mi ta kere cu e accento mester keda primordialmente poni na prevencion. Naturalmente cu esnan abusa y nan famia mester haya tur sosten, guia y ayudo profesional necesario, cual lastimamente tampoco ta optimal, pero si a cuminsa haya e atencion necesario via Social Crisis Plan.

Otro aspecto importante ta, cu apesar cu e abusadornan tin di wordo castiga fuertemente, tin di percura pa nan haya e ayudo profesional necesario. Pasobra una bes nan cumpli nan sentencia, nan ta sali bek den nos sociedad. Y e ayudo profesional mester preveni cu nan ta cay den ripiticion di e mesun actonan aki.

Simultaneamente conscientisacion y formacion tin di tuma lugar. Mayornan tin di ta mas atento unda y cu ken nan ta laga nan chikitonan. Mester empodera mayornan atraves di programanan con pa preveni abuso y con pa constata cu abuso ta tumando lugar, y con e muchanan ta wordo saca di e peliger y situacion aki. Pasobra mi kier enfatisa cu stipulacion di straf minimo y aumento di e cantidad di añanan di straf no ta bay soluciona e problema di e mucha ora cu ya el a wordo abusa, pero prevencion si.

Como sociedad, como mayor, como famia nos mester realisa cu e situacion ta uno cu nos tin di atende colectivamente. Hunto cu gobierno y parlamento, y otro instancianan mester duna atencion special y real na norma y balornan den nos Pais (mediante enseñansa) renforsando nos nucleo familiar y su fundeshi. Nos tin di enfatisa e importancia di crea relacion di confiansa entre mayornan y yiu, y keda consciente cu cada un di nos mester carga y asumi nos responsabilidad.

E situacion pa loke ta trata abuso ta algo compleho pero hunto nos mester sigui traha riba dje….te ora cu no tin ni un abuso mas!

Comments

comments