E siman a habri cu bon noticia pa nos studiantenan cu ya ta acudi na Haagse hogeschool of ta plania di bay studia na e instituto na Den Haag. Haagse Hogeschool ta bay compromete su mes cu studiantenan di Aruba, pa loke ta guia intensivo y specific na porta pero tambe durante di e studio di e hoben.
Despues cu for di aña 2010 ya a crea bon amistad cu decano y docentenan di HHS, nos a fortifica e lasonan den aña 2014 te awe. Na Juni 2015 mi tabatin e placer di por a duna un “gastcollege” na HHS y por a combersa cu basta di nos studiantenan.
Na Maart ultimo, hunto cu coleganan Jeffrey Kelly y Melvin Tromp, mi a bolbe bishita HHS y por a scucha e preocupacion y deseonan di nos studiantenan. Na mei atrobe, mi a wordo invita, e biaha aki door di un otro departamento pa papia di “stageplekken” pa nos studiantenan na nos mes isla y cu e scol kier yuda realisa esaki.
E siman aki nos a haya e grato noticia cu debi na nos input y esfuersonan, HHS a dicidi di bin cu un plan di accion specialmente dirigi na nos studiantenan, unda e exito di nos studiantenan lo ta e foco principal. Na fin di October mi ta invita pa forma parti di e grupo di trabou, y thinktank pa realisa trabounan cu lo percura cu nos studiantenan lo tin mas benificio di nan tempo di studio na Haagse hogeschool y por sigura nan exito na final.
Haagse Hogeschool ta ofrece un variedad di studio, y varios di nan na Ingles loke nos studiantenan ta prefera. Na e momentonan aki tin al rededor di 150 studiante di Aruba na HHS.