Trisomie 18, of syndrome di Edwards, ta un condicion genetico cu mundialmente ta afecta 1 riba 5000 recien naci, haciendo e condicion aki e di dos condicion genetico mas comun. Trisomie ta ora na luga di tin un pareha di chromosoom- ún procedente di mama y ún di tata- tin un di 3 chromosoom cu informacion genetico. Den caso di trisomie 18, esaki ta pasa riba e di 18 pareha di chromosoom. Ora esaki pasa riba e di 21 pareha di chromosoom, esaki yama trisomie 21, of Down syndrome. Asina ta existi condicionan genetico trisomie 13, 15, 17 etc. Esun mas grave cu e otro, pero tur cu un similaridad, esta e edad mas halto di e mama.
Teniendo cuenta cu esaki fraccion di AVP a bin cu un mocion, cu nan a duna e nomber di e baby cu su deseo di biba a start un debate riba cuido den casonan di condicion genetico, unda por tin tratamento nobo, of ainda desconoci pa mediconan na Aruba. Riba e necesidad di e tratamento aki, expertonan medico lo mester por tuma un desicion a base di nan conocemento y e posibilidad real di cura, alivio di sufrimento of mehoracion di calidad di bida como criterio decisivo.
No ta usual pa duna un mocion, ni un amienda un nomber, pero mirando cu Baby Lunah ta e iniciadora mas hoben di un debate cu a surgi den e ultimo lunanan, nos a introduci- cu permiso di Presidente di Parlamento- dunamento di titulo na mocion.
E cambio cu lo mester wordo introduci, un re-evaluacion di casonan medico no comun, manera esun di baby Lunah, lo mester no solamente conta pa e hobencita aki, pero pa tur otro mucha miembro di nos comunidad cu ta den mes situacion.
Diaranson atardi dia 16 di November mas sigur Parlamento lo vota riba tur mocion, pues tambe riba e ocion Baby Lunah.