Aruba tin diferente retonan den aña 2022. Retonan riba e parti di salud, parti financiero. Un otro reto tambe sigur ta e problemanan familiar den nos comunidad. Den noticia nos por a tuma nota di violencia den pareha, problema cu yiunan y te hasta casonan di asesinato. Sucesonan manera esaki ta causa hopi tristesa y preocupacion cerca nos tur.
Parlamentario Guedez-Erasmus ta di opinion cu nos mester enfoca mas riba e raiz di e sucesonan aki, cual ta famia. E focus di parlamentario Guedez-Eramus pa aña 2022 lo mester ta principalmente riba fortalece e famianan pa nan por desaroya optimalmente. Esaki lo ta posibel door di brinda e famianan e hermentnan necesario y yudanan desaroya habilidadnan pa nan por maneha nan famia den tempo bon y tempo malo. Como presidente di comision fiho di famia y cuido di nos grandinan, lo percura pa diferente encuentro cu diferente instancianan como meta pa nos traha hunto pa logra famianan fuerte. Pronto lo tin e prome reunion cu seccion bida y famia di Directie Sociale Zaken. E departamento aki lo duna informacion reciente di famianan cu nos tin na Aruba. Di e manera aki nos mester por mantene of bini cu leynan di iniciativa cu ta pro famia, cu por garantisa e desaroyo positivo di tur famia na Aruba.
“Mi kier motiva bo persona pa mira e aña aki como un posibilidad nobo. Cu hopi entusiasmo y cla pa traha riba cualkier reto cu por presenta. Famianan funcional sigur ta un bon inversion pa nos pais. Muchanan ta wordo lanta fuerte y a lo largo ta bira bon cuidadanonan pa nos pais. Pesey, abo y bo famia ta importante pa Aruba”, parlamentario Darlaine Guedez-Erasmus ta termina bisando.
