Parlamentario Christiaans-Yarzagaray: “Cu Alivio Fiscal 2 gobierno a logra cumpli cu mas di 60% di e puntonan di opcionnan treci dilanti pa ATIA y AHATA”

Diamars ultimo den reunion di comision fiho di Finansas y Economia (CFEZO) cu Parlamentario Setty Christiaans-Yarzagaray ta presidi, Parlamento a ricibi informacion di tanto Minister di Finansas y Economia, como Departamento di Impuesto (DIMP) y Departamento di Legislacion (DWJZ) riba e pakete di Alivio Fiscal 2. E pakete aki ta basa mas tanto riba normanan internacional (OECD y IMF) y tambe riba deseonan di gremio comercial (ATIA y AHATA) expresa den un carta cu a bay pa Gobierno na September ultimo. Gobierno ya a introduci un prome pakete di Alivio Fiscal despues cu Covid-19 a haci su entrada na Aruba y awor cu efecto di Covid ta mas concreto y tin efectonan concreto Gobierno a presenta su di dos (2) pakete cu ta consisti di 11 punto di alivio.

Pakete di Alivio Fiscal 2 mas dirigi riba empresa chikito y mediano
Mas tanto e puntonan di alivio introduci den e pakete aki ta dirigi riba empresanan chikito y mediano. E idea tras di esaki ta pa apoya e recuperacion y pa reactiva economia di Pais Aruba como consecuencia di Covid. En especial tin punto dirigi riba e sector prometedor.
DIMP ta sinti’e forsa pa ahusta su operacion y dirigi su mes mas pa ta involvi na captura e sensibilidad di e impacto economico y financiero. Pues aki DIMP a hay’e forsa na introduci instrumentonan di esfuerso di coleccion apoyando empresanen, pa preveni un colapso den entradanan presupuestario di Pais Aruba y yuda stabilisa economia. Cu esaki DIMP a asumi su rol importante den recuperacion di nos economia.

Kico Gobierno y DIMP ta spera di logra cu e Alivio Fiscal 2
Gobierno su rol den esaki ta pa evita un colapso total di nos economia. Pa e motibo aki ta tene cuenta cu deseonan husto di comercio introduciendo un serie di medidanan di ahuste fiscal na ventaha di empresanan en especial chikito y mediano. Pero tambe no mester perde di bista cu Gobierno di Aruba tin e necesidad na entrada pa caha di Gobierno. Logicamente Gobierno tambe tin su gastonan di operacion, tin su rol den economia door di inversion, tin su debenan pa paga pero alabes mester evita mas cu por di tin mester di fia mas placa cu ta necesario mirando cu esaki tin su impacto riba e debe total di Pais Aruba.

Pa conclui
Depues di a ricibi informacion bastante amplio di parti di DIMP, Parlamentario Christiaans-Yarzagaray a haci e pregunta si por duna un cifra relativo cuanto Gobierno a logra toch concretisa di e lista di deseonan entrega door di comercio. DIMP a conclui cu Gobierno a logra cumpli cu mas cu 60% di puntonan di preocupacion treci dilanti di parti di ATIA y AHATA. Esaki sigur ta un porcentahe basta halto cual ta un informacion cu por deduci cu Gobierno tin su oido y boluntad pa yuda cu e preocupacionnan treci dilanti.
Parlamento a comprende cu departamentonan di impuesto rond mondo ta haciendo e tipo di ehercicionan aki asumiendo nan rol y sperando di yuda recupera y impulsa economia. Lo introduci un ‘begunstigend beleid’ riba e cambionan den e pakete di alivio 2 aki en espera cu e ley lo yega Parlamento pa cambio.

Comments

comments