Siman pasa a tuman luga e groundbreaking di e projecto Flywheel na WEB.
Esaki ta un proyecto nobo cu ta supposed di ta un tipo di bateria basa riba energia alternativo.
Durante e ceremonia di e groundbreaking pa cu e proyecto aki por a scucha un Prome Minister di Aruba, hibando un discurso yena cu inconsistencia y mentira.
Nos a por a scucha sr. Mike Eman bisa cu Aruba ta un ehempel y ta lider den e ambito di sostenibilidad. Scuchando Minister President ta duna un discurso asina unico cu mi por pensa ta cu Aruba su Prome Minister ta keda biba den su mundo di fantasia, pasobra tur su ponencianan ta leu di ta realistico.
E ta berdad cu un desaroyo sostenibel tin hopi di haci cu e cuido y proteccion di medio ambiente. Pero tambe mester tene na cuenta otro factornan cu no ta solamente ambiental. Mester tene na cuenta tambe factornan social y economico.
Teniendo esaki na cuenta y considerando e situacion actual na Aruba, nos por conclui cu e Gobierno aki di AVP no sa kico ta un maneho sostenibel, hera pa sr. Mike Eman gaba di ta un ehempel den esaki.
Na Aruba nos ta sufriendo bou di un ola di criminalidad nunca antes bisto, unda cu casi tur dia tin atraco na negoshi y cas di hende inocente.
Servicio di salud na nos isla ta casi yegando nivelnan deplorabel y prueba di esaki ta tantisimo keho cu pashent ta vocifera diariamente.
Aki nos ta papiando di problemanan social cu Gobierno di Gabinete Mike Eman II no ta dunando atencion, pero si kier pronkia bisando cu Aruba ta un ehempel pa loke ta maneho sostenibel.
Nos tin un dump cu keto bay ta pega candela spontaneamente y saca gasnan toxico cu ta afectando salud di nos pueblo. Dump ilegal ta lanta manera paddestoel rond di nos isla y como cu no tin un maneho efectivo pa cu esaki, e instancianan concerni no por haci mucho pa preveni tiramento di sushi na manera ilegal.
Aki nos por mira cu Mike Eman y su Gobierno no ta cumpliendo tampoco cu e factor ecologico pa cu un maneho sostenibel.