Hopi biaha bo ta tende diferente politico papia di kier desaroya San Nicolas y haci’e mas atractivo. Pero hopi biaha bo ta tende tambe cu tin 2 obstaculo pa por realisa e desaroyo aki; e refineria y e prizon.
E area caminda KIA ta situa, ta un bastante atractivo cu lo por desaroya na un manera cu sigur lo capta e atencion di inversionistanan na nivel nacional y internacional.
Pero di otro banda, si nos analisa bon e locacion di e edificio di KIA, cu ta net banda di lama, bo ta haya cu salpeter ta deteriorando esaki na un manera hopi agresivo.
Durante reunion publico caminda ta tratando presupuesto di Aruba, mi a dirigi diferente pregunta na Minister Arthur Dowers pa cu e topico aki.
Kico lo bay sosode cu KIA ta un di e preguntanan cu a resalta, pa motibo cu Minister di Husticia no a contesta esaki adecuadamente.
Contesta di Minister no tabata concreto pasobra niun rato so el a contesta kico Gobierno lo haci cu KIA mirando e mal estado di e prizon.
Pero loke cu si sr. Dowers a bisa ta cu pa construi un prizon nobo lo costa entre 60 y 100 miyon florin.
Riba e pregunta pa busca e posibilidad pa cambia KIA di localidad, Minister di Husticia a enfatisa cu el a bay papia riba algun ciudadano di San Nicolas, y cu nan lo a bis’e cu nan ta contento cu KIA pasobra e ta un aporte na nos economia.
Akinan el a bisa caba cu e Gobierno aki nunca a considera di move KIA for di San Nicolas.
T’e unda cu ami sa, KIA su contribucion pa cu economia di San Nicolas ta casi nulo, y mi nunca a scucha cu ciudadanonan di San Nicolas ta contento cu KIA den nos bario.
Dus, no tin mucho contribucion positivo di KIA pa cu San Nicolas.
Pero no ta solamente e edificio di KIA mester un mehoracion, pero e trahadornan tambe tin hopi tempo ta sclama pa un miho calidad y garantia laboral.
Nos sa cu tin hopi trahador di KIA cu ta demotiva pasobra nan no ta hayando un trato adecuado pa hopi tempo caba.
Atende cu e necesidadnan laboral di e empleadonan ta un parti esencial pa asina sigura cu e trabou na e instituto aki ta uno optimal.
MEP ta boga pa bin cu un estudio rond di Aruba pa asina saca afo cua lo ta e miho localidad pa pone un prizon nobo.
Mester tene cuenta sigur cu diferente factor, pero si duna KIA un miho localidad e lo ta un win-win situation tanto pa Gobierno y Aruba en general.