Indudablemente e apertura di e refineria di Aruba ta representa un gran logro pa nos pais.
No solamente e ta representa un crecemento den nos economia y un boost pa e progreso cu San Nicolas tanto mester di dje, pero tambe e apertura di e refineria ta nifica un oportunidad laboral pa nos hobennan.
E ta di spera cu CITGO, Refineria Di Aruba y e contratistanan lo yuda duna un estimulo na nos studiantenan pa nan traha den e refineria.
Esnan cu ta den scol technico y administrativo lo por cuminsa prepara nan mes pa cuminsa traha den e diferente areanan di e refineria tambe.
Di e manera aki ta duna nos localnan e oportunidad pa siña un trabou nobo tambe, cu automaticamente lo baha e cantidad di trahador cu lo mester di importa.
Hobennan cu pa un motibo of otro no a caba scol awor lo haya e oportunidad di siña un trabou cu lo duna nan un mihor calidad di bida, lagandonan leu di cualkier mal caminda.
Esnan cu por ta aworaki tin un trabou cu no ta yuda cubri nan gasto, ta mira un oportunidad pa mehora nan economia.
Historia a siña nos cu traha den refineria ta nifica un oportunidad laboral cu ta permiti e persona educa su mes den diferente area laboral.
Awe nos por mira diferente yiu di tera cu ta profesionalnan grandi danki na nan trabou den refineria.
CITGO y Gobierno a compromete nan mes di crea proyectonan pa asina yuda construi un mihor comunidad pa nos isla, y den esey nos ta compronde tambe cu lo yuda educa nos hobennan creando oportunidad di trabou pa e generacion aki tambe.