Na Aruba nos a hereda e cultura di piscamento for di nos antepasadonan. Lastimamente awendia e cultura aki ta birando uno hopi dificil pa mantene. Nos tur sa cu biba di laman no ta facil y actualmente no tin un manera pa regula y controla piscamento na Aruba. Esaki ta trece cun’e cu nos piscadornan no ta hayando e atencion y apoyo necesario for di Gobierno.
Ta existi un Departamento di Sector Primario, di cual Santa Rosa tin e encargo pa maneha e sector di pesca, pero lamentablemente nos por mira cu e regulacion pa cu piscamento na Aruba, ta practicamente nulo.
Si no crea un politica di pesca cu un statuto y regulacion efectivo, nos lo keda enfrenta problema cerca e piscadornan. Nos lo mira, por ehempel, con e yiu homber di e piscado no lo kier sigui cu e trabou aki pasobra el a mira su tata y famia pasa den duro, pasobra no tin manera pa sostene un famia mas door di biba di e ganashi cu piscamento ta laga atras. E yiu muhe di un piscador no lo kier casa cu un piscador, pasobra el a mira cu awendia piscamento na Aruba no ta duna un famia e posibilidad pa biba di dje. Esaki ta haci cu yiu y desendiente di famianan piscador, ta lagando e cultura y custumber aki un banda pa busca un miho futuro economico.
Di e manera aki e conocemento di e actividad di pesca na Aruba bay perdi sin e posibilidad di saca un probecho real for di dje. Y loke ta pio, nos cultura y identidad Arubano ta bayendo perdi asina aki, pasobra piscamento semper tabata un stempel di e homber trahado na Aruba.
Lamentablemente nos piscadornan nunca a sa di haya e apoyo necesario for di Gobierno, locual cu ta haci cu no tin canalnan di comunicacion efectivo, pasobra esnan cu ta existi caba ta poco y sin eficiencia.
Gobierno lo mester considera e bentahanan cu lo tin pa nos comunidad si crea un maneho efectivo pa cu e cultura di piscamento na Aruba. Nos a yega di mira diferente programa cu a purba di implementa pa piscamento na Aruba, pero esakinan a fracasa pasobra no a realisa un siguimento y evaluacion di e resultadonan cu a haya.
Mi tin e conviccion cu ora MEP drenta Gobierno, nos lo bay duna e piscadornan e atencion debido y apoyo cu nan merece. Nos lo haci esaki door di separa e maneho di pesca for di agricultura y cria. Nos ta convenci cu pesca mester bay den un maneho individual, pero kedando bou di e capa di Santa Rosa.
Nos ta kere cu Santa Rosa mester por brinda e piscado e oportunidad pa e por cumpra e productonan cu e mester na un prijs mas accesibel. Haciendo esaki lo crea un “win-win situation” tanto pa e consumidor como pa e piscador. Si e piscador haya e oportunidad di cumpra su productonan na un miho prijs, e consumidor lo por cumpra pisca na un prijs mas accesibel tambe.