Recientemente den conferencia di prensa semanal di Partido MEP, Parlamentario di sr. Guillfred Besaril, a elabora riba e topico “Edad di Pensioen General”. Sr. Besaril a declara lo siguiente.
“Recientemente nos a sinta cu diferente profesional den e area di recursos humanos. Partido MEP kier a scucha di nan kico ta e posibel impacto di e aumento di edad di pensioen general te na 65 aña pa nan compania of organisacion. Loke a resalta di e ehercio aki ta e hecho cu vooral bou di esnan cu ta traha warda of profesionnan sumamente fisico (manera den construccion of housekeeping), e aumento aki ta sumamente devastador. E grupo specifico ‘ki ta esnan cu hopi biaha ta constata un desgaste asina profundo, cu casi nan no por carga e peso di sigui labora te na e edad di 65 aña. Nan salud ta bay atras y hunto cu esaki nan productividad. Mas cu claro semper tin excepcion y loke e profesionalnan ta remarca ta mas bien den liña general.
Tin un diferencia grandi entre esnan cu ta eherce trabounan di oficina y esnan cu ta traha warda of ofishinan fisico. En bista di e desaroyo ‘ki den nos mercado laboral actual, den cual tin un desempleo grandi bou nos hobennan combina cu e informacion cu nos ta acumulando for di e profesionalnan riba e tereno di labor, nos por conclui cu e edad di pensioen general no por keda 65 aña. Pues apesar di ta un reto grandi, Movimiento Electoral di Pueblo (MEP) den un futuro gobernacion lo haci e ehercio necesario pa baha e edad di pensioen general na un edad mas aceptabel, esta di 62 aña!
Gabinete di sr. Mike Eman a hiba un maneho sumamente inconsistente pa loke ta trata e tema di pensioen general. A hisa e edad di pensioen general na 65 aña pa supuestamente duna e fondo social di pensioen un rosea, sinembargo mane cu gobierno a haya un chens, e prome accion cu sr. Eman a tuma tabata di exonera gobierno di paga un suma di 60 miyon Florin na e fondo! Nos di partido MEP ta considera e echo aki un accion di mala fe di parti di Gabinete di sr. Eman contra di tur futuro pensionado. Si tabata tin e placa pa duna un “kwijtschelding” (exoneracion), nifica cu e fondo ta solido y por lo tanto e aumento di edad di pensioen general na 65 aña no tabata nada otro c’un medida indirecto mas riba lomba di e clase trahado!
E famoso “Dialogo (A)social” tabata e instrumento principal di Gabinete di sr. Mike Eman pa pusha un cantidad di medida indirecto riba lomba di e clase trahado Arubano. El a cuminsa na un aumento di e primanan di AZV y SVB. A continua cu un aumento di BBO den forma di BAZV pa finalmente claba Pueblo e puñal di aumento di edad di pensioen general. E clase trahado y nos futuro pensionadonan merece mas respet y reconocimento pa nan contribucion laboral. P’esey e compromiso di Movimiento Electoral di Pueblo pa baha e edad di pensioen na 62 aña no ta solamente pa duna e clase laboral un alivio. E ta alabes un muestra di aprecio social cu un persona merece despues di drenta e etapa conoci como “Tercer Edad”.
Exito di e mercado laboral di un Pais ta depende grandemente di e desempeño general di e clase trahador. E politica actual di sr. Mike Eman ta basa riba crea mas oportunidad na inverti den “Klinker cu Asfalt” riba custia di Pueblo. Contrario na e practica di maltrato social aki di sr. Eman, partido MEP ta convenci cu si stimula e clase trahador cu incentivonan positivo mane un edad di pensioen general husto (62 aña), e lo aporta na mobilidad (mas empleo bou nos hobennan) y mas productividad den e mercado laboral di Aruba”. Parlamentario Besaril ta termina bisando.