CANBERA, Australia- Un baby di dos luna a marca historia na Australia, pa ta e prome persona pa wordo cria den parlamento.
E baby, yama Alia Joy, ta e yiu recien naci di e Senadora pa Queensland Larissa Waters.
Waters, un di e lidernan di e partido Berde di Australia, a regresa despues di su zwangerschapverlof diahuebs, cu su yiu den brasa.
Ora cu Alia Joy tabata tin hamber, su mama tabata aliment’e.
“Mi ta orguyso di cu mi yiu Alia ta e prome baby pa wordo alimenta den Parlamento Federal”, Larissa a scirbi ariba su cuenta di Twitter.
Aña pasa, parlamento Australiano a cambia su reglanan pa permiti parlamentarionan femenino pa alimenta nan yiunan den e sala. Prome cu esey, e muchanan no por a drenta e luga. Y e vota di e mamanan, durante e periodo di lactancia tabata wordo delega via un machtiging.
“Alia incluso ta dunami mas inspiracion pa sigui lucha contra di e desigualdad di genero y stop e cambio climatico peligroso. Y si, si e tin hamber, e lo wordo alimenta den parlamento”.
Fuente: CNN