Ta for di 2017 caba, pueblo a cera conoci c’un gobierno sin vision, un gobierno sin interes den bienestar di pueblo y un gobierno cu no tin ningun intencion di saca man y yuda tur esunnan cu menos entrada y tur cu ta confrontando problema serio pa cubri gastonan di cas.
Parlamentario Arthur Dowers di fraccion di AVP ta mustra cu a haci tanto fanfaria cu e asina yama FASE durante di pandemia, caminda lo mester a yuda principalmente esunnan cu a perde trabou den sector priva pa sobrevivi e periodo aki.
Durante di campaña di 2021, entre otro Minister Glenbert Croes a informa votadonan cu si MEP no bin bek den gobierno, FASE lo disparce pero segun parlamentario Dowers, e minister no a bisa pueblo cu den e proyecto di FASE aki, tambe tin ‘friends & family’ cu a ricibi FASE contra tur regla existente.
“No solamente e asunto di FASE so pero hasta Prome Minister Evelyn a bin dilanti y sigura werksternan cu su gobierno lo regla nan situacion financiero, lo sigura cu nan lo keda cu nan trabou y cu gobierno lo percura pa nan sigui traha.
Nada mas a ser haci, awe werksternan ta cay bou di SKOA cu a dicidi di bay over na aumenta schoolgeld entrante proximo aña escolar, pa asina cubri gastonan di maneho cu a aumenta formalmente den ultimo añanan.
MEP a drenta gobierno y FASE a disparce despues cu hopi caso no corecto a keda detecta y werksternan nunca mas a tende di Evelyn y nan situacion no a wordo aclaria completamente ainda.
Ta ora cu nos scucha e cosnan aki, ora cu analisa e aumento di schoolgeld cu SKOA a anuncia, ta mas cu claro cu pueblo lo haya su mes den mas gasto y cu menos placa pero pa Gabinete Wever Croes II, esaki no ta problema y hasta ta mustra cu pueblo no mester di gobierno su ayudo.
Loke ta haci e anuncio di aumento di placa di scol pa SKOA, ta e hecho cu den mesun siman pasa, tambe a bin dilanti e informacion cu gabinete Wever Croes II kier presenta un ley pa exonera ex Minister di MEP, Edison Briesen caminda lo tin cu paga un compania e suma di 2.1 miyon florin.
Si e ley pasa esaki ta nifica cu Briesen kende ta bao di investigacion actualmente, gobierno ta libra su ex minister di paga 2.1 miyon florin y e suma aki ta pueblo lo paga esaki, pues pueblo lo paga pa mal maneho di Minister Briesen durante cu e tabata minister den gabinete Nelson Orlando Oduber.
Pa completa obra, diaranson siman pasa Parlamento a bin hunto pa libra minister Xiomara Maduro di paga un suma riba 200 mil florin pa decisionnan cu el a tuma y cu e no tabatin mag di tuma, loke ta pone su persona mescos cu Briesen, personalmente responsabel pa e debenan aki.
Pues aki pueblo por mira un biaha mas con gobierno di Prome Minister Evelyn ta yuda su hendenan prome cu e yuda pueblo y ta bolbe confirma cu e gobierno di MEP aki, nunca tabatin pueblo na pecho y nunca lo yuda pueblo den e situacion cu e gobierno aki mes a hinca henter e pais aden,” Parlamentario Arthur Dowers a declara.
