Village Basketball Court sigur ta e resultado di un bon colaboracion entre diferente departamento cu ta resorta bou di Minister Endy Croes.
Nos por corda con e cancha tabata deplorabel y peligroso pa e habitantenan di Village y bisindario. Awe nos por wak cu e cancha ta un hoya di proyecto. E trayecto no tabata uno facil y cu recurso financiero limita, pero e minister a demostra cu ora tin e deseo, disciplina, dedicacion y determinacion ta logra e meta comun. Nos por wak bek riba un proyecto exitoso na bienestar di e mucha- y hobennan di San Nicolas. Durante mi bishitanan na e cancha mi por mira e muchanan den bario contento ta practicando deporte.
Loke falta ainda ta un bari di sushi, cual ta importante pa esnan cu ta frecuenta e cancha aki, por deshaci di nan desperdicio. Tambe, falta e gol di futbol y un net di volleyball. Sigur un plan di MANTENCION ta di vital importancia pa asina nos por gosa di e cancha pa hopi aña.
Esaki mester ta un colaboracion entre e habitantenan, esnan cu ta haci uzo di e cancha deportivo y gobierno. Mi ta invita e habitantenan di Village y bisindario pa e apertura oficial cu ta tuma luga diabierna 22 di maart di 5:30 pm pa 7:30 pm. Danki na Minister Endy Croes y su ekipo pa duna oido na nos peticion y pa ehecuta e bunita proyecto aki. Alabes mi ta gradici e habitantenan di Village y bisindario pa nan pasenshi y “input”.