Cuerpo Policial di Aruba a ricibi for di Salvador Franken di Parke Nacional Arikok un mapa unda tin tres zona riba dje. Ta trata di zona uno (Shete), zona dos (Centro) y zona tres (Vader Piet). Esaki ta un mapa traha pa den caso di emergencia por tin un zonificacion, pa haci cu Polis por yega na e area mas lihe y pa yuda miho den caso di emergencia. A entrega e mapa na Cuerpo di Policial pa pone un copia den cada Warda di Polis.
Comisario Trudy Hassel y Lilliana Rasmijn, di e departamento di Informacion y Comunicacion di Cuerpo Policial a ricibi e mapanan como tambe e yabi cu ta duna Polis acceso na e area di Parke Nacional Arikok den e area di Yamanota.
Trudy Hassel a expresa palabranan di gradicimento na Parke Nacional Arikok pa e confianza deposita den Cuerpo Policial. Nan lo haci hopi bon uzo di e mapa, no solamente na e warda nan, pero tambe na Centrale Post di Polis pa asina nan sa exactamente kico ta pasando y guia e Polisnan riba caya pa yega na e sitio mas pronto posibel. E yabi lo haci uzo di dje na momentonan cu ta necesario, a enfatisa.
Comisario Hassel a haci un peticion na tur bishitante di Parke Nacional Arikok pa respeta e Park Rangers den nan trabao. “Tur dia nan ta traha cu alma y cuerpo pa asina por garantisa cu cada bishitante cu yega den e parke por pasa den e parke na un manera sigur y contento”. Ta p’esey Polis ta pidi cooperacion di un y tur pa por fabor laga e Park Rangers haci nan trabao debidamente.
“Na nomber di Cuerpo Policial nos ta gradici Parke Nacional Arikok, Sr. Salvador Franken, pa e confiansa y bo por conta cu Cuerpo Policial t’ey pa yuda boso den boso trabao”, asina Comisario Hassel a termina su discurso.