E trabounan ta sigui na Spaans Lagoen caminda a inicia e ehecucion di e Plan di Maneho
pa e area importante akinan cual por cierto a wordo reconoci internacionalmente na aña 1980 como un area Ramsar. E area di Spaans Lagoen sigur ta un parti cu tin balor cultural, historico y geologico y ademas ta trece cun’e un biodiversidad inmenso y merece e atencion y cuido apropia. Spaans Lagoen a wordo traspasa oficialmente pa Parke Nacional Arikok (PNA) na Maart 2017 durante un bishita di su Mahestad Prinses Beatrix. E area ta cubri un total di 70 hectar y ta conecta cu PNA.
Desde e momento di traspaso PNA a monitor e area akinan y alabes a traha riba un Plan di Maneho. E Plan di Maneho lo wordo publica dentro poco y lo por wordo lesa pa full e comunidad di Aruba via e website di PNA www.arubanationalpark.org. E punto nan di atencion cu ta di importancia pa e area akinan lo ta e maneho y restauracion di habitat y especienan, e recreacion y acceso publico di e area di Spaans Lagoen, maneho di especienan invasivo, y proteccion legal pa e area. Por ultimo lo sondea y monitor e area completo caminda por comunica na varios manera e resultado nan y necesidad pa cu e area di Spaans Lagoen. Asina caba por menciona cu a pone borchi nan di regla nan cu e bishitante nan mester tene cuenta cun’e. E borchi nan lo asisti e proceso di sondeo den e area akinan caminda lo analisa e situacion di Spaans Lagoen na e momento nan aki cual resultado ta beneficioso pa PNA y tur persona, organisacion cu ta haci uzo recreativo di e area akinan.
E Ramsar area akinan asina lo ricibi e atencion necesario mirando cu Aruba tin un area relativamente chikito pa proteha y conserva cu otro isla of pais nan mas grandi.
Spaans Lagoen lo ser maneha bou di e mesun reglanan di PNA y adicionalmente lo tin un area restringi pa bishitante cual lo ta e recorido cu ta anexo di e mangel nan y lagun. E area akinan di aproximadamente 1 km ta hopi sensitivo y lo por wordo bishita solamente bou guia di un Ranger di PNA. Esaki lo asisti PNA den nan esfuerso di conservacion, proteccion y sondeo. Na e momento nan aki e area ta conta cu hopi trafico cual PNA kier dun’e su tempo pa recupera. E area akinan ta di suma importancia pa e flora y fauna caminda mester regula y maneha e acceso pa asina limita y of preveni un impacto na e naturalesa.
Den un sondeo preliminar a conclui cu tin aproximadamente 250 especie di flora y fauna, di cual por cierto algun di e flora y fauna akinan ta wordo protegi bou leynan local y internacional. Sigur esaki lo fungi como un nulmeting pa e area di Spaans Lagoen y nos lo por mira di cerca con esaki lo sigui avansa den transcurso di e ehecucion di e Plan di Maneho di Spaans Lagoen.
Den e proximo dianan y simannan nos lo sinta cu diferente stakeholders y partnernan pa asina nos presenta e Plan di Maneho na nan caminda nos por intercambia diferente punto nan di importancia ya asina nos por garantisa e existencia y calidad di nos area Ramsar pa e comunidad di Aruba y e futuro generacion cu tambe tin e derecho di disfruta di e area akinan.