Ta asina cu tin sondeonan cu a wordo haci unda ta mustra cu mayoria turista cu ta bishita Parke ta bini pa Conchi, awor si no tin opcion pa bin Conchi mas via UTV, a puntra Parke si tin un otro opcion con e turista lo por yega Conchi di awo pa dilanti.
Carl Quant, vocero di Parke Nacional Arikok ta splica cu Parke tambe ta hiba sondeonan, tabata tin uno riba e tema aki cu a wordo hiba na final di 2019, y e aña aki ta bezig cu un otro. Pa loke ta resultado di encuesta di aña pasa, sr. Quant ta splica cu e area mas bishita tabata e Cuevanan. “Akinan nos tin cu para keto un rato y tuma nota cu gran parti di nos bishitantenan individual, hopi biaha ta bay e cuevanan”, segun sr. Quant.
Pa loke ta trata e area di Conchi, manera asigna dentro di e plan di maneho ‘Managing Nature Conservation’ tin un aspecto hopi grandi unda lo regula Jeeps, di tal forma cu Parke tambe mester busca un manera pa tene Parke accesibel. Dus no por stop tur vehiculo di motor pero Parke mester brinda turistanan e opcion pa yega e area akinan.
Esaki ta un proceso cu no lo ta a corto plaso segun Parke, pero sigur un proceso cu nan ta trahando riba dje caba mirando e situacion di Covid19 cu eigenlijk mester planifica un rato e aspecto financiero pa loke ta e inversionnan cu mester wordo haci.
Pa loke ta trata decisionnan y plan di maneho den cuadro cu regulacion di vehiculo di motor dentro di area protegi, Parke a hiba varios reunion y presentacion pa empleadonan. “Mi ta kere primordialmente ta importante pa nos splica e impacto cu e vehiculonan aki tin riba naturalesa, dus na momento cu empleadonan mira y compronde esaki, nan tambe di nan turno por splica esaki miho na tur nos bishitantenan”, segun sr. Quant. E ta sigui splica cu esaki no ta conta solamente pa Rangers den veld, pero tambe pa personal den oficina cu tin contacto cu bishitantenan por medio di email. Tur detayes di plan di maneho a wordo splica detayadamente na empleadonan di Parke.
E situacion di Covid19 a trece no solamente pa Aruba pero globalmente un impacto bastante grandi, ta haci cu organisacionnan tin cu tuma cierto decisionnan. “E decisionnan akinan pa cu Parke Nacional Arikok a ser comunica hunto cu sindicato, y empleadonan di tal forma cu tin balans caminda cu no ta tur decision ta den nos man, pero e decisionnan akinan sigur tin impaco di Covid19 cu mester tene consideracion cu ne”, sr. Quant ta bisa.