CIUDAD DE MEXICO, Mexico- E pareha Mexicano asesinonan den serie, yama ‘Monstruonan’ di Ecatepec (un municipio cerca di ciudad di Mexico), a practica canibalismo durante e tempo cu nan a mata un decena di persona, segun un informe di e portal SinEmbargo.
Aracely González, mama di un adolscente di 13 aña cu a disparce na 2012, diabierna a bisa cu Juan Carlos ‘N’ y Patricia ‘N’ a descuartisa su yiu muhe y a come algun di e partinan di su curpa. “Despues di a corta mi yiu su pianan, nan a haci’e como bistek. Juan Carlos a haci bistek di e pianan di mi yiu muhe, esey el a bisa den su declaracion.
Aracely y su famia a muda na 2011 pa e mesun edificio unda e pareha criminal tabata bia. Despues nan a cuminsa un amistad. “El a probecha pa abusa di nos confianza, el a laga pasa pa nos amigo”, e mama a conta.
Juan Carlos ainda tabata bishita e famia ainda despues di a asesina e menor, pendiente di e investigacion. “El a hasta bay declara den caso di mi yiu”, e mama ta sigui bisa, pidiendo ‘pena maximo’ pa e pareha deteni.
Durante e tratamento di e caso diabierna, unda cu Ministerio Publico di estado di Mexico a acusa e pareha formalmente di delito di feminicidio, e dos detenidonan aaki a bisa di a haci “pozole” (cuminda tipico di Mexico) cu e carni di e otro victimanan.
Ademas, Juan Carlos a declara cu su obhetivo tabata pa mata mas di 100 hende muhe, pero ta “masha poco” ta esunnan cu el a logra mata.
E dos sospechosonan a wordo deteni siman pasa ora cu nan tabata traslada e restonan di un curpa humano den un stroller. Den un di su prome declaracionnan, Juan Carlos ‘N’ a bisa cu e tabata odia e hende muhe y el a adverti cu si e sali den libertad, e lo sigui comete e actonan aki. “Mi ta prefera pa mi cachonan come e carni di e muhenan aki cu nan sigui hala e mesun rosea cumi”, el a afirma.