ASTURIAS, Spaña- Plataforma di Afectadonan pa e Hipoteca di Oviedo ta denuncia cu Corte no a cumpli cu e convencio cu ta obliga na comunica na Servicionan Social di situacionnan di vulnerabilidad special.
Un matrimonio di 72 y 74 aña a pasa dos dia y dos anochi riba un banki den e conocido parke San Fransisco, na Oviedo, noord di Spaña, despues di a wordo saca for di e vivienda unda nan a biba den e ultimo añanan, door di no por paga e huur mensual.
E situacion a wordo denuncia pa e Plataforma di Afectadonan pa Hipoteca (PAH) di Oviedo, cu a haya sa di e situacion di e ancianonan aki. Den un comunicado di presna, nan ta haya cu e corte a actua di manera “negligente y inhumano”, ademas di “incompatibel cu respeto na nan derecho fundamental di tin un vivienda adecuado reconoci den varios convenio internacional”.
Tambe, nan ta denuncia e tribunal di no a cumpli cu e convenio pa e prevencion di e dos personanan aki saca for di nan cas, firma dia 15 di maart pa e Conseho General di e poder hudicial, e Gobierno di e Principado di Asturias y e Federacion Asturiana di Conceho. Segun e acuerdo aki, e tribunal ta obliga na pone na conocimento di Servicionan Social, situacionnan di vulnerabilidad special, como tambe asesora e famia riba recursonan di asistencia social. E convenio ta considera expresamente personanan mayor di 65 aña obheto di atencion special.
Biba di pension di 300 euro
Segun e medio local La Nueva España, e pareha tabata biba riba un pension di solamente 300 euro, mientras cu e huur tabata di 500 euro.
Actualmente, e pareha ta kedando temporalmente na cas di conocirnan y ya caba a bay Servicionan Social di e Municipio, aunke “nan estado psicologico ta teribel. Nan ta devasta y na limite di e depresion”.