Tur siman nos por lesa cu un of mas pareha Mericano a wordo nombra Goodwill Ambassador di Aruba. Masha poco nos por mira bishitantenan di Hulanda honra asina.
Siman pasa e racha a kibra dia cu un pareha Hulandes a ricibi nan reconocimento for di ATA – Aruba Tourism Authority. Den presencia di algun di nan amigonan Arubiano na un reunion organisa pa Clyde y Milagro Harms e pareha Hulandes Klaas y Jannie Bant – Baas a ricibi nan diploma cu ta certifica nan como Goodwill Ambassador di Aruba. E inimitabel Ricardo Croes di ATA a haci e presentacion y alabes a sorprende e pareha cu algun souvenir bunita di Aruba.
E pareha Bant a bin Aruba pa prome bes na 1973 tempo cu Klaas a firma un contract pa bin duna les di Geografia (Aardrijkskunde) na Colegio Arubano y pa siña e futuro docentenan na APA cu awor ta IPA, Instituto Pedagogico Arubano. Nan tres yiunan a asisti Mon Plaisir School, y nan yiu mayor Willem tambe a asisti Colegio Arubano durante dos aña prome cu e famia a bolbe Hulanda na 1977.
Na aña 1986 famia Bant a bolbe Aruba pa un vakantie largo y nan a huur e cas di un ex colega di Klaas, e conocido Frans van Drie kende tambe ta un educador cu a haci Aruba su cas permanente.
Siguiendo pasonan di su tata, na 1993 Willem a bolbe Aruba cu su casa Lieneke Koopman pa duna les na Colegio Arubano pa 5 aña. E siguiente aña e pareha Bant Koopman a wordo bendiciona cu nan prome yiu kende nan a duna nomber di su welo, Klaas. E siguiente aña e famia a crece cu un Arubiano mas, Jan, yama pa su wela Jannie. Opa Klaas y Oma Jannie a bin bishita nan yiu y nietonan tur aña. Ta interesante pa menciona cu Klaas awor ta trahando riba su Master’s Degree cu speransa di bira di tres generacion di Bant pa duna les na Colegio.
Despues di pasa dos aña na Hulanda caminda Willem a traha riba un grado mas halto, e pareha Bant – Koopman a bolbe Aruba y desde e tempo ey, Opa Klaas y Oma Jannie a bishita Aruba tur aña, algun aña hasta dos bes. Klaas a calcula cu nan a bin Aruba por lo menos 25 bes. Esaki ta ekivalente na un total di casi mil ora di vuelo entre Schiphol y Aeropuerto Reina Beatrix pa nan bishita nos isla.
Klaas y Jannie a recorda e pasado y a menciona algun di e multitud di cambionan cu a tuma luga riba nan isla stima. E crecemento exponencial di cantidad di auto riba careteranan, luz di trafico, rotonde, un aeropuerto grandi y moderno, cantidad di hotel luhoso. Hasta Colegio Arubano a cambia. Na 1973 Lago ainda tabata funciona. Berdaderamente, e Aruba di 2017 ta completamente diferente di e Aruba cu nan a conoce na 1973. Pero Jannie y Klaas ta sigura nos cu algun cos a keda mescos: e clima sabroso, e solo, e playanan y mas importante cu tur cos, e cordialidad di e pueblo Arubiano.
Klaas y Jannie tambe ta masha contento di nota cu Aruba ta paga hopi mas atencion na su cultura, naturaleza y ambiente. Nan ta contento di mira e restoracion di e edificionan historico y naturalmente, na Arikok Natural Park.
Klaas y Jannie a sigura nos cu ta bale la pena pa sigui bula 18 ora tur aña pa bin bishita nan Aruba stima.