Recientemente grupo di gaita Paranda Ta Nos a tene un actividad na Plaza Botica Paradera unda a batisa nan CD “Brinda y Celebra” pa festeha 15 aña deleitando pueblo di Aruba cu dushi musica di pasco y fin di aña.
Cu animacion di Julisa Boekhoudt e actividad a cuminsa cu grupo di baile K2K y Pierewietje deleitando nos muchanan y tambe tentnan a ofrece cuminda crioyo, obra di man y cos dushi. Despues grupo Melodia a habri e actividad oficialmente cu nos himno y sigui cu nan dushi musica. Grupo di gaita Muchanan di Mama Rosa a pone ambiente pa asina habri caminda pa e bautismo di CD di Paranda Ta Nos.
MC Ruben Garcia y Cherryldine Buckley a yama Grupo Paranda Ta Nos riba escenario unda nan a luci un diseño exclusivo di Trash by Ronchi. A pasa den e trayectoria di Paranda Ta Nos interpretando e canticanan mas popular durante ultimo añanan. Tambe Paranda Ta Nos a reconoce su 6 integrantenan Janny Donata, Haydy Valdez-Boekhoudt, Miguel Valdez, Jair Boekhoudt, Chris Boekhoudt y Sigmar Bethencourt pa nan aporte di 15 aña cu e grupo. E publico grandi ansioso pa e acto di bautismo y asina e CD a yega cu drone pa e madrinanan Sharon Arends-Bareño y Esline Boekhoudt y padrinonan Dimitri Frans y Robert Maduro por a bendicione. Paranda Ta Nos a resona su canticanan nobo pa asina e pueblo sa kico por spera riba e CD “Brinda y Celebra”. Pa culmina e anochi Rincon Boyz a sa di pone ambiente pa tur hende por a celebra hunto cu Paranda Ta Nos.
Paranda Ta Nos ta gradici Papa Dios pa e talento y guia durante 15 aña, cada integrante y famia, cada compositor y areglista, cada locutor y miembro di prensa, comision, fiel patrocinadornan, e fanaticada y pueblo di Aruba pa e respaldo ricibi.
Cu compra di cada CD cu 16 cantica pa solamente Afl. 35,= lo yuda Paranda Ta Nos duna pueblo bek den forma di donacion caritativo manera ta custumber. Pa un presentacion priva of publico por tuma contacto ainda cu Esline na 7331703 of via Facebook of [email protected].