Dia 26 di oktober, ta net dos dia menos cu un luna prome cu e tan spera “Paranda di Bochincha” cu a cruza brug di Spaans Lagoen rumbo pa San Nicolas! E aña aki cu sosten di Brouwerij Nacional Balashi y Malta Balashi, e paranda ta bay bira un biaha mas un experiencia involvidabel pa nos invitadonan.
Cruz Cora Aruba ta aworaki asercando tur compania di truck y tambe tur truck particular pa asina cuminsa registra truck. Y otro siman e team Bochincha lo bishita skolnan special pa asina cuminsa trece e bon noticia pa tur e clientenan y asina cuminsa registra participante. Manera tur aña, cada cliente lo ta invitado special den cabina di truck y lo compaña e chauffeur riba e ruta pa mas of menos dos ora. E salida lo ta 3’or di atardi for di Brouwerij Balashi y lo bolbe bek pa caba rond 6pm aki bek.
Cruz Cora ta pidi tur mayor of representante di un persona cu kier participa, pa por fabor yama nos y inscribi na tel. 582-2219 mas pronto posibel. Tambe nos ta pidi tur compania cu tin truck of esunnan particular pa yama nos pa registra. Mas truck nos por conta cu ne, mas luga nos por ofrece nos invitadonan.
Ruta 2018:
Salida for di Brouwerij National
Rotonde Balashi
Pasa riba brug nobo
Bai straight San Nicolas te yega Warda di Polis/Burger King
Bira na man robez y drenta Weg Seroe Preto
Yega na e tennis court y drenta Caya Jose Geerman na man robez
Pasa door di Brazil y Mabon
Na Rooi Kochi (pasa dilanti SPO) bai straight abou te final di caya bai y bai na man robez
Yega skina di cas di ex Gobernador Refunjol y bira na man drechi
Yega birada pa bai Piscina Olympico te final di caya bira na man drechi
Pasa dilanti Zeerovers
Pasa caminda patras di Santo Largo-La Granja patras
Spaans Lagoenweg te birada pa bai Mangel Halto
Pasa dilanti Marina Pirata
Yega dilanti Telearuba
Pasa brug bieu
Bai straight abou rumbo Brouwerij Nacional Balashi pa e final
Paranda di Bochincha no por existi sin e sosten di tur su sponsors y voluntarionan. Cada aña e grupo di sponsors ta bira mas grandi y por casi bisa cu e actividad ta wordo carga pa tur e partners aki. Nan entusiasmo pa e proyecto ta haci’e posibel y pesey Cruz Cora Aruba kier yama DANKI na Brouwerij Nacional Balashi, Clickprint, Matutino Diario, Compra NV, Prographics, Dr. Pixels y Volunteer Motor Unit. Tur compania cu kier aporta di un of otro manera por tuma contacto cu Cruz Cora na tel. 582-2219 of [email protected] y asina yuda nos brinda e clientenan special aki un tremendo dia!
Tambe ta pidi publico pa join e paranda riba ruta. Gruponan di famia, amigonan, sport clubs, scouting, teams di deporte: sali pafor, decora cu blaas y warda e parada yega y duna sosten na e grupo aki. Esaki ta nan dia!