GUERRERO, Mexico- Un paramedico di Cruz Cora Mexicano y tres polis a wordo asesina diadomingo na San Juan Teneria, municipio di Taxco, na Guerrero, despues di a wordo ataca pa un comando di mas o menos 20 homber.
E hecho a tuma luga mientras e boluntario di Cruz Cora tabata entrega paña na e pobladornan, manera deken y jacket, pa e temporada di friu. Esaki a wordo informa door di Roberto Alvarez, vocero di Siguridad di e Grupo di Coordinacion Guerrero, den declaracionnan na ADN40.
Alvarez a sigui bisa cu e atacantenan tabata tin entre 18 y 20 aña di edad, cu riflenan manera e cartelnan di droga ta uza, nan a yega di manera inespera y de pronto a cuminsa tira riba e polisnan estatal, contra e poblacion y contra di e paramediconan di Cruz Cora.
“Ainda no ta conoci exactamente cual ta e grupo delictivo cu a comete e hecho condenabel aki”, Alvarez a bisa.
Ademas di e seis personanan asesina, tabata tin seis otro personanan herida, cuater paramedico di Cruz Cora y dos civil.
Den un comunicado, Crus Cora Mexicano a condena e atake. E organisacion a señala cu e “agresion” contra e personal “no solamente ta daña e institucion, sino cu e ta afecta beneficiarionan, ya cu nan tin speransa di ricibi yudanda pa mitiga nan sufrimento”.