CIUDAD DI VATICANO, Vaticano – Papa Francisco a aproba diaranson e decreto cu ta reconoce e milager atribui na e intercesion di e muchanan Portugues na Fatima, Francisco y Jacinta Martos, e oficina di prensa di Vaticano a informa.
Tras e aprobacion di e decreto, e dos muchanan, cu pa Iglesia Catolica, a presencia e aparicionnan di la Birgen na comienso di siglo XX na Portugal, por wordo declara santo, EFE a cita.
No ta descarta cu e ceremonia di canonisacion wordo celebra pa papa Francisco durante su bishita na e santuario di la Birgen di Fatima, dia 12 y 13 di Mei proximo.
E milager cu ta permiti e canonisacion di e dos muchanan aki ta e curacion di un mucha Brasileño.
E decreto ta reconoce “e milager atribui na e intercesion di e beato Francisco Marto, naci dia 11 di Juni 1908 y fayeci dia 4 di April, 1919 y di e beata Jacinta Marto, naci dia 11 di Maart, 1910 y fayeci dia 20 di Februari 1920,” e nota di Vaticano ta precisa.
Dia 13 di Mei, e catoliconan ta celebra e prome aparicion na 1917 di La Birgen dilanti e tres mucha cuidado di carne: Jacinta, Francisco y Lucia den e localidad di Fatima, mas of menos un 100 kilometer di e capital, Lisboa.
Segun e creencia, e Birgen a aparece otro cinco biaha a lo largo di aña 1917 y durante e aparicionnan a realisa varios profecia, recomendacion y a entrega tres mensahe conoci como “e tres secretonan di Fatima.”
Soeur Lucia, e unico cu a sobrevivi y kende a muri na 2005, poco luna prome cu Juan Pablo II, a revela varios decada atras e dos prome secretonan: den ep rome a duna e vision di infierno, di e gueranan cu a azota Europa, mientras cu e di dos tabata papia di con pa reconverti mundo na cristiandad.
E texto di e di tres misterio a mantene den secreto pa hopi aña y solamente a wordo revela na 2000, precisamente na Fatima.
Segun Vaticano, ta referi na e atentado cu Juan Pablo II a sufri dia 13 di Mei, 1981 riba e plaza San Pedro, 64 aniversario di e prome aparicion di Fatima y e lucha entre comunismo ateo y iglesia den siglo XX.
Fuente: El Universal