Diabierna Papa Fransisco a felicita Donald Trump como e president nobo di Merca y el a anim’e na defende e dignidad humano y libertad di mundo henter, cu ta sumergi den un grave crisis humanitario.
E magnate Neyorquino Donald Trump, diabierna a comberti su mes den e di 45 president di Merca, den un ceremonia di huramentacion na Washington, den presencia di entre otro, su predecesor, Barack Obama.
Papa Fransisco y Trump a protagonisa aña pasa na februari, un cruce di declaracionnan despues di cu Fransisco a bisa cu lanta un muraya, refiriendo na decision di Trump pa lanta un muraya na e frontera di Mexico cu Merca, no ta algo cu un Cristian lo haci. Esaki no a cay den bon tera cerca Trump, pero despues e relacion entre e Pontifice y Trump a wak un mehoransa.
Durante su pontificado, Bergoglio a mustra interes special pa Merca, pais cu ela bishita na September 2015 y tanto Obama como presidente Raul Castro, a gradici’e su apoyo den e proceso di descongelamento di relacionnan entre Washington y Havana.