Ciudad di Vaticano, VATICANO- Durante e resamento di e Angelus dominical riba e Plasa di Martirnan den e localidad di Carpi na Italia, Papa Fransisco a expresa su preocupacion debi na e situacion politico cu tanto Paraguay como Venezuela ta pasando aden. Ademas el a manda un mensahe di solidaridad cu e victimanan di e avalancha registra na Colombia.
Durante su vigilia apostolico, Bergoglio a afirma cu e ta sigui “cu hopi interes lo ta pasando na Venezuela y Paraguay. Mi ta resa pa e poblacionnan, cu tanto mi ta stima y mi ta invita boso tur pa persevera sin cansa, evitando violencia, den e buskeda di solucionnan politico”.
Ademas, e cabesanto di Iglesia Catolico a realisa un oracion pa e victimanan di e avalancha na Colombia, cual el a afirma cu e ta “profundamente doli”, ya cu den e desastre natural aki ta hopi hende a perde nan bida y ademas tin un gran cantidad di personanan herida”.
Di otro banda, el a apunta cu “noticianan ta sigui drenta di enfrentamentonan sangriento den e region di Kasai den e Republica Democratico di Congo. E enfrentamentonan aki ta provoca victimanan y desplaso cu ta afecta tanto personanan como propiedadnan di iglesia”.
Debi na e situacion aki, e pontifice a expresa cu e lo acerca e nacion aki y a haci un yamado na tur hende pa resa pa paz, pa e curasonnan di esunnan cu ta comete tal crimennan no sigui di ta un esclavo di odio y violencia”.