Papa Fransisco ta acepta renuncia di pastoor acusa di a tapa e abusonan cometi den su parokia

ROMA/BRASILIA- Papa Fransisco a acepta e renuncia di e Obispo di Limeira den e estado Brasilero di Sao Paolo, Msgr. Vilson Dias de Oliveira. E ta wordo acusa di a tapa pa e abusonan sexual di un pastoor y di a extorsiona varios presbitero na Brazil.
Diabierna, 17 di mei e Oficina di Prensa di Vaticano a informa cu e Pontifice a acepta e renuncia di e Obispo, sin duna niun motibo.
Normalmente obisponan ta presenta su renuncia na edad di 75 aña, segun e Codigo di Derecho Canonico ta establece cu ta e norma cu ta goberna den Iglesia, cu ta señala tambe cu e renuncia por tuma luga “si door di malesa of otro causa grave cu ta disminui su capacidad pa desempeña su cargo”.
Msgr. Vilson Dias de Oliveira, di 60 aña, a entrega su renuncia door di e acusacionnan di a sconde e abusonan sexual cometi pa un pastoor den su diocesis, Pedro Leandro Ricardo, cu tabata rector y pastoor di e parokia di e Basílica Santo Antonio de Padua den e ciudad Americana den e estado di Sao Paulo.
Na januari di e aña aki, e obispo a suspende e pastoor P. Leandro Ricardo, di su funcionnan ministerial, door di e acusacionnan di cuater persona cu lo tabata victima di e pastoor entre 2002 y 2003, tempo cu nan tabata menor di edad.
Husticia Brazilero actualmente ta investiga Msgr. Dias de Oliveira pa a sconde e abusonan, enrikicimento ilicito, y di presuntamente a extorsiona al menos tres otro pastoor, segun O Globo ta informa.

Comments

comments