CIUDAD DI VATICANO, Vaticano- Papa Francisco diahuebs mainta a reuni cu e miembronan di e Conferencia Episcopal Venezolano pa combersa riba e crisis social cu e pais ta enfrentando, segun e Conferencia Episcopal di Venezuela a informa ariba su cuenta di Twitter.
Durante un audiencia priva, que segun informenan a dura mas o menos un hora, e obisponan Venezolano a entrega informenan cu ta biba den e pais, caminda mas di 60 persona a perde nan bida durante e protestanan anti- gubernamental cu ta ya den su di dos luna.
Na e reunion a asisti seis obispo Venezolano, entre nan monsegnieur Diego Padron, arzobispo di Cumana y presidente de Conferencia Episcopal di Venezuela; monsegnieur José Luis Azuaje, obispo di Barinas y vicepresidente di e Conferencia; monsegnieur Mario del Valle Moronta, obispo di San Cristóbal y monsegnieur Víctor Hugo Basabe, obispo di San Felipe, entre otro.
Papa Francisco a mustra su preocupacion na varios oportunidad pa cu e crisis na Venezuela. Dia 5 di Mei ultimo, el a manda un mensahe unda cu e ta bisa cu “e ta sinti un dolor profundo pa e confrontacionnan y e violencia di e dianan aki cu a causa varios morto y heridonan”.
Francisco, den ecarta, ta manifesta su solidaridad cu e Obisponan Venezolano y el a gradici nan yamadanan pa evita “cualkier forma di violencia, pa respeta derechonan di e ciudadanonan y pa defende y promove e dignidad humano y e derechonan fundamental”.
E carta a bin den publicidad un siman despues cu e papa a regresa di su biahe pa Egipto y a papia tocante Venezuela.
Den un dialogo cu e periodistanan, e Pontifice a sigura cu oposicion Venezolano ta dividi, algo cu no a cay den bon tera cerca miembronan di oposicion.
Na varios ocasion, Papa Fransisco a haci un yamada na tur e sectornan di e sociedad Venezolano pa evita e violencia y pa duna prioridad na dialogo pa soluciona e crisis politico den e pais.
Fuente: www.cnnenespanol.com