CIUDAD DI VATICANO, Vaticano – Cientos di miles di persona a reuni riba Plaza San Pedro, unda cu papa Francisco a canonisa diadomingo Mama Teresa di Calcuta, fundado di e Misioneronan di Caridad, e yama mama di pober y marginadonan di sociedad. E religioso a wordo beatifica dia 19 di October 2003, pa e tempo ey papa Juan Pablo II.
“Depsues di e debido deliberacion y oracion frecuente pa e asistencia divino, y door di a busca conseho di hopi di nos rumannan den e episcopado, nos ta declara, e beata Teresa di Calcuta, como santo y nos ta incluy’e entre e Santonan y nos ta decreta cu e tin cu wordo venera como tal pa henter Iglesia,” Francisco a proclama.
Despues, durante e homilia, e pontifice a papia di algun rason pa cual Teresa di Calcuta a wordo eleva riba e altarnan.
El a splica cu Dios ta gusta tur obra di misericordia.
“Awe mi ta entrega e emblematica figura di muhe y di consagra na henter mundo di e boluntariado: cu e ta un modelo di santidad,” papa a bisa.
E obispo di roma a recorda con Santa Teresa di Calcuta tabata pone su mes na disposicion di tur pa medio di e acogida y e defensa di bida humano.
Na final di su mensahe, e pontifice a haci voto pa e modelo di bida di Santa Teresa di Calcuta yuda na compronde cu e unico criterio di accion di cristiannan ta e amor gratuito, liber di tur ideologia y di tur vinculo, sin distincion di idioma, cultura, rasa of religion.
Fuente: CNN en Español