Internacional: Papa Francisco a aparece na su bentana di e hospital Gemelli na Roma y a ofrece un bendicion pa prome biaha desde cu el a wordo interna dia 14 di februari.
E pontifice di 88 aña di edad a wordo duna ordo cu e por bandona Hospital algun minuut despues y dokternan ta bisa cu e lo tin mester di por lo menos dos luna di sosiego na Vaticano.
Durante e ultimo cinco siman, el a presenta “dos episodio hopi critico” unda su “bida tabata na peliger”, Dr. Sergio Alfieri, un di e dokternan cu ta trata e Papa, a bisa.
Papa Francisco nunca a wordo intuba y semper a keda alerta y orienta, Dr. Alfieri a bisa. Aunke e Papa no ta completamente cura, e no tin pulmonia mas y lo bolbe traha mas pronto posibel, si e tendencia sigui, dokternan ta bisa.
Alcalde di Roma Roberto Gualtieri a bisa BBC cu el a sinti “un alegria realmente grandi, emocion grandi pa mira Papa Francisco sali for di hospital”.
“E ta un gran regalo pa e ciudad y pa mundo nos ta sosten’e y ta sinti nos mes realmente serca di dje,” e alcalde a bisa.
E Papa a wordo mira solamente un biaha pa publico anteriormente desde cu el a wordo interna den hospital, den un potret divulga pa Vaticano siman pasa, cu a mustr’e ta resa den un kapel di hospital.
Na comienso di e luna aki, un grabacion di audio di Papa Francisco a wordo toca den Plaza di San Pedro na Ciudad di Vaticano.
Su bos tabata sin rosea ora e tabata gradici e fielnan catolico pa nan oracionnan.
Papa Francisco a pasa 12 aña como lider di Iglesia Catolico Romano.
El a sufri un cantidad di problema di salud durante henter su bida, incluyendo a kita parti di un di su pulmonnan na edad di 21 aña, haciendo e mas riesgoso na infeccionnan.
