Dialuna a toca turno na Panama, den su debut den Copa Mundial pa topa e makinaria cora, e Belganan.
Mester bisa cu a pesar di cu Panama a hunga un bon wega, e oportunidadnan tabata t’ey, pero simpelmente Panama no tabata sa di a probecha di nan. Belgica a impone riba e debutante Panama, danki na un gol di Mertens y un doblete di Lukaku (3-0). A pesar di cu Belgica a domina e partido casi por completo, desde un comienso, e golnan a cuminsa drenta den e di dos parti di e partido cu golnan di Mertens y di Lukaku.
Den e prome parti, Panama tabata por a resisti e atakenan di Belgica, danki na e portero Jaime Penedo. E keeper, e mas destaca di e ekipo, a wanta un awasero di tiro y a evita cu e Belganan a delanta den varios ocasion. Mayoria di e intento tabata protagonisa pa Hazard y Mertens, cu un unico tiro di Lukaku.
Net prome cu a bay half-time, un gol di Mertens a duna Belgica e bentaha na di 48 minuut. E hungado Napoles a manda un cañon pa e arco di Panama, sin cu Penedo por a haci mucho.
Den e di dos parti di e partido Belgica a sigui ataca e arco di Panama, e debutantenan den e mundial tabata purba di tur manera pa yega na habri nan marcador, pero poco biaha nan a forma un menasa real pa Courtois.
Den e di 68 minuut Lukaku, su so dilanti Penedo, ta probecha e pase di De Bruyne, ta tira ariba e gol y asina aumenta e score di 2-0. E diablo coranan, manera nan ta wordo yama, a sigui domina e partido, te na momento cu Witsel ta pone un bala largo pa Lukaku, cu ta manda e bala sin cu e portero por a haci nada.
Asina tambe Belgica ta supera Panama, y ta keda tambe un di e faboritonan den e grupo aki.