Recientemente St. Fundacion Facilidadnan Deportivo, FFD a re-instala e tres palonan di luz na Piscina Olimpico Roly Bisslik na Savaneta. Despues di un periodo cu esakinan wordo renoba a instala tur tres palo pa asina e usuarionan por haci uso di e piscina den oranan di anochi. Mester bisa cu e estado anteriormente di e palonan aki tabata deteroria y tabata un estorbo y sigur un peliger pa tur cu ta haci uzo di e piscina mirando cu esakinan a frustia por completo y mester a haya e atencion necesario.
Director di FFD, Ing. Junior Tromp a splica cu mester a cuminsa un caminda y mesora a opta pa baha e palonan di luz mirando e peliger cu esakinan por a trece cun’e.
“Nos a opta pa baha e tres palonan di lus door cu e basenan tabata completamente frustia na e parti abou. Mester a traha full un base nobo pa cada uno y tambe controla e coriente mes, pone luznan identico y cambia e cabelnan pa uno nobo”, Ing Tromp a enfatisa. Ta bon pa menciona cu tin plan pa reemplasa e scoreboard actual pa uno mas nobo unda ta buscando diferente oferta.
Awor esnan cu ta practica e deporte di landamento, landamento sincronisa, waterpolo, triathlon, landamento escolar y lesnan di landamento lo por uza e facilidad den oranan di anochi. Pa siman hopi hende ta haci uso di e piscina den oranan di anochi y awor por haci esaki den tur trankilidad. Den e forma aki tambe Minister di Deporte y St. Fundacion Lotto pa Deporte lo sigui sostene deporte y inverti na mehoracion y renobacion pa brinda nos atletanan e miho oportunidad posibel.