FUNCHAL, Madeira – E caido di un mata grandi y di mas di shen aña bieu riba un docena di devotonan durante un peregrinacion riba e isla di Madeira, teritorio insular Portugues den Atlantico, a mata por lo menos 13 persona y a laga 50 otro persona herida, di cual shete ta grave. Entre e fayecidonan tin un menor di edad.
Manera ya caba ta tradicion, miles di persona ta participa dia 15 di Augustus a lo largo di e isla den e tipo di celebracionnan aki, riba e dia di nan patrona, e birgen di Nos Señora del Monte cu ta nomber di un localidad unda cu e tragedia a tuma luga. Cientos di persona tabata congrega sperando e inicio di e procesion den e zona “Largo da Fonte” ora cu e palo a bin abao cayendo ariba e publico presente.
“Nos a skucha un zonido, mi a bira wak ariba, mi tabata tin mi yiu band’i mi. Mi a wak solamente con e palo tabata bin abao, asina ta cu mi coy mi yiu y mi a hay’e. Por a skucha un zonido masha duro mes”, un testigo a splica.
E peregrinacion a wordo cancela despues di e incidente y entre e heridonan tin personanan stranhero procedente di Alemania, Hungria y Francia.
E aldea de Monte ta ubica p’afo di Funchal, capital di Madeira.
Fuente: http://es.euronews.com