WASHINGTON, D.C/NEW YORK- Autoridadnan a anuncia di e hayasgo di paketeann sospechoso manda pa ex presidente Barack Obama ( (2009-2017) y e ex secretaria di Estado Hillary Clinton. Pero Servicio Secreto a logra intercepta otro paketenan sospechoso dirigi pa un congresista Democrata, y e edificio di Time Warner na New York.
Den un comunicado, Servicio Secreto a precisa cu el a intercepta un pakete manda pa Clinton, tambe un ex candidata presidencial, na su cas den e condado di Westchester (New York) na ultimo hora di diamars.
Mientras, diaranson a intercepta otro pakete na Washington, dirigi pa e cas di famia Obama.
PAKETENAN SOSPECHOSO
E pakete manda pa e sede di e cadena di television tabata dirigi pa e ex director di CIA, John Brennan, CNN a informa despues, atribuyendo e informacion na tres fuente no identifica. Brennan a traha bou di e administracion di gobierno di Obama.
Na Florida, e congresista Democrata Debbie Wasserman Schultz tambe a ricibi un pakete sospechoso, e comisario di e condado di Broward, Scott Israel a informa.
Cu Wasserman, ta bira tres politico Democrata cu ta ricibi paketenan sospechoso.
Otro medio cu a wordo desaloha diaranson tabata The San Diego Union Tribune despues cu a haya varios pakete sospechoso na e entrada di e edificio unda cu e tin su sede, polis a informa.
Vicepresidente di Merca, Mike Pence a condena e hechonan, mediante un tweet, cu a wordo comparti tambe door di Presidente Trump.
Un funcionario cu a papia den forma di anonimato cu varios medio a bisa cu e dispositivonan manda pa Obama y Clinton ta similar na esun haya den e cas di e filantropo multimiyonario George Soros dialuna ultimo.
E cas di Soros ta situa den un suburbio den e parti noord di New York.
Motibo di e bomb manda pa Soros ta desconoci te ainda, según un di e funcionarionan di NYT.