E Organisacion Panamericano di Salud (PAHO), a alerta riba e circulacion di SARS-CoV-2 y otro virus respiratorio den e region di Americas, incluyendo Caribe.
PAHO a bisa cu su update epidemiologico ta ofrece “recomendacion pa mantene e vigilancia di e virusnan aki y fortalece e reaccion di e sistemanan di salud, particularmente mirando e actual brote di otro malesa transmisibel.”
Den 2023, e organismo di salud a bisa cu a registra nivel halto di malesa respiratorio severo den e region, “Impulsa p’e circulacion di SARS-CoV-2, griep y e virus respiratorio sincitial.”
Actualmente, e hemisferio nort ta experenciando epidemia di e tres virusnan premira pa winter, mientras cu algun pais di e hemisferio zuid ta registrando incidencia superior n’esunnan premira p’e temporada, debi n’e circulacion di SARS-CoV-2, PAHO a señala.
A recomenda e paisnan miembro pa mantene e vigilancia di e virusnan respiratorio “pa detecta cualkier cambio den e circulacion of gravedad di e malesa; ta prepara pa responde na un posibel aumento di caso y hospitalisacion; y sigui cu e esfuersonan pa aumenta e vacunacion contra griep y COVID-19, en particular den e poblacionnan vulnerabel y di alto riesgo.”
PAHO tambe a urgi n’e paisnan di e region pa “mantene e sistemanan di salud prepara y alerta riba tur nivel pa responde na un posibel aumento di caso ambulatorio y hospitalisacion, specialmente coincidiendo cu e periodo epidemico di otro malesa transmisibel cu demanda halto di atencion.”